競價時段，交易混亂，昨日港股收市前時段運作如常，點知收市後才是「戲肉」，不少股份在4時收市後10分鐘競價時段大幅波動，無端被踢高質低，而且成交唔細。
個別股份在競價時段「離奇」被挾高，中鐵建（1186）一度「競」見20元，最後「U」盤造14元；連炒味不濃的中電（002）亦無厘頭被「U」高9%至70.50元。
蒙能走勢令人嘆為觀止
最離譜係現價市盈率已超過2800倍的蒙古能源（276），該股雖獲納入MSCI指數，但昨日表現本來全程捱沽，一度低見14.40元，豈料收市後一個50幾球「U」盤就成功嘜高，倒升14.19%至17.70元收市！
其實港交所（388）為乜推行收市競價，散戶叢中已有不少非議，事關該檔時段大戶點玩都得，好似蒙能個例子，全日走勢根本唔使睇，但競價時段一個50幾球踢上去，散戶可能因而被誤導隻股份「有料到」而事後盲目追入。家陣咁搞法，星俠認為，交易所倒不如索性取消正常股市交易時段，事關玩10分鐘都夠喇，何必要睇足全場市況？