期指結算後港股繼續造好，多得前晚花旗股市及噚日A股靠穩支持，恒指升149點收市，值得留意嘅係現貨成交增加好多，有855億，喺呢個時勢，算係大成交支持升市，下禮拜一可以睇好啲。
「窩輪事件」仲係調查之中，睇傳媒報道嘅資料，係有人喺制度之中鑽空子搵食，可以視為個別事件，俊樺認為事件最大嘅受害者係有關窩輪嘅發行商，而唔係普羅窩輪炒家。
輪市成交已回增
唔可以話一件事情就否定晒成個制度，每個制度都有佢嘅漏洞，但係唔係個個漏洞都要填塞，因為當中涉及其他更大嘅代價，呢啲都係監管機構好清楚嘅，相信事件唔會對港股同窩輪市場帶來衝擊，可以預計，發行商仲緊張過監管機構同窩輪炒家，佢哋必定會加強內部監控保障自己同股民嘅利益。噚日窩輪成交已多番，相信好快就會回復正常。
大唐C輪13139：大唐（991）昨收5.67元，升6.5巴仙，走勢好靚，成交又夠大，下個目標係上試250日線，即係6.257元附近，破位就睇6.60元，可以諗吓隻C輪13139，昨收1.39元，槓桿率4.1倍（有效2.7倍），正股升上6.60元，13139應該唔會低過2.05元，如果正股跌穿喺5.18元條10日線，沽咗隻輪止蝕。