港島最旺係銅鑼灣，順理成章呢區亦特別多上樓Cafe，一幢樓隨時收收埋埋三五七間。洗咗幾晚樓，發現呢區Cafe嘅特點係夠開揚、裝修Grand，牆壁裝潢多數用鮮色，仲要女仔客特別多。女仔斯文，傾偈睇書夠Hea一晚，從玻璃窗望落街，銅鑼灣依然逼爆人，上樓Cafe頓成寧靜空間，行到疲想唞一唞，上樓嘆杯Drink啦。
記者：洪偉順
攝影：楊錦文
模特兒：Arichi；JoJo、Carol、Stephanie@StageModels
銅鑼灣篇
1.簡約就是好
「CafeZentro」裝修簡約，一室沉實木板，白牆襯黑色梳化，落地玻璃窗掛埋窗簾，頭頂幾盞吊燈，畀到人好舒服嘅感覺。老闆Ivan專登揀舊唐樓開設Cafe：「唐樓無咁嘈，坐得舒服啲。擺皮椅、卡位同埋L形梳化，簡簡單單仲好睇，我希望親近顧客，所以廚房係半開放式。」平時最多客人上嚟睇書，女仔客佔6成，「佢哋真係好襟Hea㗎，最長紀錄有個女仔，坐足八個鐘狂煲愛情小說，佢就睇到眼濕濕，我就睇到眼突突。」女仔愛花，店內擺咗好多鮮花，務求吸引更多女仔客。
（地址：銅鑼灣富明街2號寶富大廈2樓B室/28828944）
四式芝士蟹肉雜菌長通粉$58，芝士夠香，長通粉估唔到咁煙韌，雜菌粒粒有咬口；曲奇咖啡$40，香濃可口，有曲奇碎咬吓，無咁悶。
心太軟$48，薄皮包住香濃朱古力漿，一切流晒出嚟，再食濃情朱古力，視覺味覺雙重享受；加多杯黑白芝麻豆腐$42，感覺好Fresh。
牛仔腸伴香芥洋葱汁$36，成呎長牛仔腸肉汁豐富，同微辣香芥洋葱汁好夾，唔使下下都伴茄汁咁悶蛋。
2.白領鐵竇
「CafeOnBoard」形式接近路邊Coffeeshop，老闆娘Anita曾經遊學英國，熱愛英國文化，所以牆身掛滿當年遊學倫敦最鍾意嘅景點畫，加多八張英式枱椅，非常之歐陸情懷。驟眼見，客人以上班族居多，Anita：「好多西裝友上嚟Hea㗎，OL又會帶埋手提電腦捧場，話晒上咗樓，俾人捉到蛇王嘅機會都細啲啦。」明白，一句到尾即係白領鐵竇。
（地址：銅鑼灣富明街寶富大廈2樓L室/28827626）
d.芝士焗茄子雜菌意粉$48，芝士味濃烈，茄子同雜菌汁液十足；士多啤梨水蜜桃特飲$38，好醒胃。
e.藍莓芝士蛋糕$35，芝士酸味中和到藍莓甜膩；唔會甜到漏，加多杯冰凍莫卡咖啡$38，啱啱好。
3.i=我
「i-Cafe」呢個店名，簡單不失莊重，個「i」字代表「我」，暗示以客為本喎。開業一年，八成客都係女仔客，三個女人一個墟，老闆Isabella話：「一放工，班OL就會上嚟傾心事，將積埋嘅寃屈氣吐出嚟，一坐就個幾兩個鐘。」好少Cafe用金色做主調色，因為好俗氣，「i-Cafe」用深沉金色加曲線圖案佈置，效果出奇地好。
（地址：銅鑼灣波斯富街61號1樓/28931888）
i.12吋秘製燒豬仔骨，套餐包餐湯、頭盤、飲品及甜品$118，豬仔骨先浸微辣帶甜嘅秘製燒汁，浸完再燒，鎖住水份保持肉質軟嫩，輕輕一篤肉已經離骨，唔使你咬到一嘴係汁；水蜜桃Smoothie$42，入口果香四溢，健康有益。
j.扒龍脷柳配香橙莎莎，套餐包餐湯、頭盤、飲品及甜品$94，番茄、鮮橙汁加三色燈籠椒製成甜酸醬，直接淋上煎熟嘅薄嫩魚塊，龍脷柳咬落仲有少少脆，醬汁醒胃，超好味。
k.牛肉酥皮卷配菠菜闊條麵，套餐包餐湯、頭盤、飲品及甜品$92，造型似巨形春卷，先將牛肉粒同雜菜碎炒熟，再放入酥皮，加秘製醬汁煮五分鐘搞掂，入口爽到痹，牛肉味濃郁。
第一次幫襯CafeOnBoard，環境幾安靜。
傾偈舒服，唔似喺茶餐廳，要嗌破喉嚨講嘢。
成日同朋友嚟CafeOnBoardgathering。
i-Cafe環境唔錯，下次會帶女朋友嚟。
Zentro幾好氣氛，Dating一流呀。
Zentro食物有水準，幾好坐。
Zentro幾好Mood，傾偈唔怕嘈，掂呀。
幾好吖，嗌杯嘢飲就可以坐成晚。
