山口式VF-1J麥斯藍機，嘩！咩FriendShop限定版喎！個朵限定成咁，都係百六蚊咋喎！好抵呀呵？中計喇。
麥斯米娜呢對超時空天才機師夫婦，一對嘅，但係想玩埋人哋老婆？麻煩喇。首先要買啱啱出咗幾日嘅6月號《HobbyJapan》，用張隨書嘅應募券再畀千九幾yen，11月就有貨攞，不過，最慘係唔受你班港仔玩……惟有搵玩具舖訂啦！本書26號先喺日本出，我噚日去旺角「太空船」昅昅，訂山口美娜機幾錢呀？「買本《HobbyJapan》加$299。」咁本書又幾錢呀？「暫時賣晒。」即係AirMail版已經斷咗，要等多陣買船貨。
計番條數，本書八百幾yen，隻嘢千九幾yen，即係十幾算。唉，我買咗藍機，冇得算㗎喇，儲唔齊一套我會死㗎！冇得玩玩具我又會死㗎！𠵱家有錢都冇書賣呀，今次我死梗喇！
記者：嘴嚼爺