自從03年之後，每年嘅7.1當日，愛國陣營例牌以慶祝回歸為名，搞一堆諸如巡遊之類嘅喜慶活動，製造歌舞昇平效果，企圖冲淡民陣舉辦7.1遊行嘅氣氛。究竟左派咁做實際可以搶走幾多客源，八方無從統計，不過今年左派宣佈暫時收手停辦一年．就珍珠都冇咁真。
搞手之一嘅工聯會會長鄭耀棠話，工聯會早前開咗會，原本決定今年續辦，話晒北京今年歷史性主辦奧運，係大事中嘅大事，點都值得賀吓；不過人算不如天算，四川忽然發生大地震，市民心情普遍唔多好，所以決定今年停辦巡遊，改為舉辦小型活動，低調慶回歸。換句話講，泛民今年搞7.1大遊行，少咗好多人爭維園、爭路行。