葛民輝擔任林海峰（阿Jan）首晚棟篤笑騷嘉賓後，因為疲勞過度引致心臟不適而暈倒，阿Jan表示當晚已即時往醫院探望好友，他透露阿葛已沒有大礙，還撩護士傾偈，對於有傳阿葛有心臟病，阿Jan不忘鬼馬本色地說：「咁證明我同佢有心病啦！」
林海峰大前晚（周三）在紅館演出首場「ENCOREALWAYSON林海峰是但噏求其大合唱PARTII」，好拍檔葛民輝擔任嘉賓與阿Jan化身「高山青龍」合唱，但演出完後阿葛心臟不適暈倒送院，目前仍然留醫。
醫生叮囑多休息
前晚阿Jan在第二場騷上單拖演出「高山青龍」，阿Jan在台上說：「本來我阿青同阿龍一齊演出，但阿龍第一晚太興奮，今晚嚟唔到，不過佢好快同大家見面，我打電話畀佢，佢冇嘢，好好，仲騷擾緊啲護士同佢傾偈，大家放心，佢好快同大家亮相。」
雖然唱獨腳戲，但阿Jan表現沒有受到影響，當晚完騷後阿Jan到後台接受訪問，他透露：「阿葛OK喎，佢仲寫字條畀我話自己冇問題，叫我做好個騷。首晚完騷後我去探佢，今日就冇。」
對於有傳阿葛心臟有問題，阿Jan不離搞笑本色：「咁證明我同佢有心病啦！少不免報道有啲誇張，佢係有啲問題，但唔係咁嚴重，唔係咁大件事。」阿Jan透露阿葛家人叫所有人不需要去探他，因為阿葛已沒有大礙，只是醫生要他多些休息。
收起銀包防走佬
商台查小欣昨日則在節目中轉述阿葛家姐的說話，她說：「佢家姐話佢唔使吊鹽水，笑佢冇瞓十年八年，呢幾年做咗三、四世嘅嘢，佢一入院個假紋身仲嚇親啲姑娘，阿葛就叫佢哋鍾意點check就點check，佢好生猛，佢哋擔心阿葛擅自出院，所以攞走佢三件寶物，包括電話，閂佢水喉（指銀包）同拖鞋，再唔聽話就除埋佢條褲，大家放心，下月初佢就同大家見面。」
採訪：何慧斯、王連連、李珮洳
攝影：林德雄、仇志德
斷背小八卦：盧凱彤同性相伴好避忌
at17的盧凱彤（Ellen）近日被發現和同性密友Cathy經常出雙入對，又指她們共賦同居，因而傳出斷背情。前晚Ellen和Cathy雙雙到紅館看林海峰的棟篤笑騷，不過兩人狀甚避忌，Cathy見傳媒影相更遮面，不過完騷後Ellen和Cathy跟一名友人同坐一架的士離開。對於傳出斷背情，Ellen表示：「我哋只係朋友，𠵱家我冇拍拖，我哋at17未試過有狗仔跟，真係多謝傳媒吹捧。」
