收市後嘅競價時段，推行到第5日，終於出現大場面，好多股價同成交都出現極大異動，有大升，亦有大跌，而且成交亦係天文數字，有咗競價時段，造市仲變本加厲，交易所肯定始料不及。
「合法造市」涉及股票有好多隻，例如中電（002），原本4點時收65.35元，結果收70.50，升咗5.15元，成交唔少，有1350萬股，總值9.5億元，同「正常」收市價相比，成條數相差約6900萬，買家點解咁大方，唔明。
另外嘅例子數不勝數，香格里拉（069）原收23.20元，結果收26.30元，造高3.10元，成交百多萬股；蒙古能源（276）原收14.98元，結果收17.70元，升咗2.72元，成交仲係5560萬股，總值成10億元，「拜也」畀多成1.5億元。中國鐵建（1186）收14元，比12.48元升咗1.52元，短短10分鐘，升咗12%，成交亦有1280萬股。
出現明顯轉勢訊號
有人歡喜有人愁，造低嘅股票亦有唔少，中芯（981）就被「開刀」，原收0.51元，大插到0.48元收，仲成咗1.4億股；至於隻湖南有色（2626），原本收2.96元，結果收2.61元，跌咗0.35元，10分鐘內大跌12%，成交3480萬股，仲多過全日嘅3000萬股。噚日雖然係大摩指數調整，但以前都試過好多次，未見過咁「離譜」嘅場面。
和成國際（651）亦係受惠股，不過佢噚日嘅表現已好勁，尾段再錦上添花而已。和成原本收14.6仙，已上升15%，成交亦已大增到8000多萬股，尾段「U」上15.6仙收，成交1180萬股，此股由高位回落頗多，噚日明顯轉勢，可留意。
和成已轉型造船業，現年度（12月年結）獲保證盈利不少於6億元，數字好吸引，噚日股價一支大陽燭抽上去，一舉而升穿10日、20日同50日平均線，以及中期下降軌，MACD亦出現熊牛入貨訊號，短線可向2月的20仙高位推進。