性感女子組合Freeze、龔嘉欣及三位日本女模等，前晚到銅鑼灣出席內衣騷，其中Freeze成員甄穎珊拆除了前額的植髮，額頭看來有點異相。對於成員石詠莉率先作個人發展，陳樂榣表示：「冇唔開心，但有啲怪怪哋，我冇向老闆詐型，不過我都同老闆傾過，想向司儀方面發展。」有傳有新成員加入，陳樂榣聲稱沒有聽聞，她笑說：「石詠莉冇人可以取代到，佢身材咁正。」陳樂榣坦言三人間中也會鬧交，但不會向老闆爭寵，她表示：「我哋唔係擦鞋嘅人，黐身黐勢，老闆都會叫我哋彈開。」石詠莉則踢爆陳樂榣因減肥，上圍由E級跌到D級。
喜歡簡單款式
另外，關楚耀緋聞女友龔嘉欣和另一「四葉女」關婉珊一同出現，問龔嘉欣喜歡那種款式內衣，她表示：「唔要誇張，但鍾意色彩多啲。」她又表示不會做內衣模特兒，至於三點式則還可以。問到有沒有和關楚耀聯絡？龔嘉欣稱：「少咗，大家各有各忙，不過唔擔心會生疏。」
採訪：何慧斯
攝影：陳順禎