小妹呢排收到一個email，講到手機有一啲不一樣嘅三大功能，寫到似層層咁。第一樣係手機有緊急撥號功能，如果用家發現所在嘅地方，好似山頭野嶺，手機冇咗所屬網絡商信號但又遇到緊急狀況，只要打112，手機會自動搜索所有可用嘅網絡進行緊急呼叫。
第二樣功能係手機可當遙控器打開車門。假如你開車門嗰陣，發現車匙留喺車入邊，開唔到門，但後備車匙喺屋企，車主只要用手機撥通在家親人嘅手機，一邊將手機指向車門，同時家人拎住後備遙控器喺手機旁邊按響遙控器嘅開鎖鍵，車門就可打開。第三個功能係隱形電池，當手機電量不足按*3370#鍵，手機重新啓動電量增加50%。
緊急召援打112
講到咁神奇，小妹搵港大電機電子工程學系副教授張星煒了解一下。張教授話，呢個112緊急救援號碼係真有其事，就算你掹咗手機嘅Sim卡，一樣打到，電話會自動駁去999。手機開車門理論上可以。車門遙控器分聲控同紅外線，前者簡單啲，遙控門匙嘅訊號經手機傳到另一手機，同一頻道可打開門車，即係架車透過手機聽到「嘟嘟」聲就開門。紅外線就複雜啲，要將紅外線訊號轉為音頻經手機傳到另一個手機開車門，「除非車匙同手機都有將紅外線轉為音頻嘅功能，否則另裝轉換器，都幾複雜。」手機隱形電池功能就冇乜科學根據。
電郵：mailto:[email protected]
逢周六、周日刊出