喺2000年成立嘅樂群社會服務處，先後喺港島同九龍設有五個服務中心，今年仲會殺入新界，大埔服務中心10月開幕。發展越大，所需經費自然越多，佢哋今日舉行全港賣旗，成功請嚟勞工及福利局局長張建宗企街，喺觀塘裕民坊幫手賣旗籌募經費。張建宗一向有平民局長之稱，今日就用行動做證明，大家不妨睇吓佢下海嘅叫座力，可以為樂群籌到幾多錢。
講開又講，原來「同珍集團」第三代揸fit人、身兼廣東省政協常委嘅王賜豪都好支持樂群，除咗率先捐咗20萬之外，今日亦會夥拍班名人一齊賣旗。呢位愛國陣營嘅明日之星係郭家麒嘅師弟，86年港大醫學院畢業，佢好關心時事，話唔定係N年後嘅副局長人選都唔出奇。