香港壁球手、香港奧運火炬手麥珮軒為四川地震災民籌款，早排特別透過商台將佢支奧運火炬拎嚟拍賣，所有善款捐畀福幼基金會，用作救災之用。八方估唔到麥珮軒嗰支有幸運編號「3368」嘅火炬咁受歡迎，傳聞吸引到電盈小小超重鎚用170萬競投，不過小小超臨門撻Q，竟然喺最後關頭有人出手仲重過佢，用成180萬競投呢支火炬，呢個人正係中華廠商會副會長林大輝。
林大輝同為火炬跑手
噚日商台搞咗個火炬移交儀式，由麥珮軒將支火炬交畀林大輝，再將包括嗰支拍賣火炬、麥珮軒當日着住跑步傳送聖火套運動衫、波鞋、頭箍，籌到嘅182.6萬善款，交畀福幼基金會。投得火炬嘅林大輝都係火炬手，因此早已擁有一支火炬，今次出手競投，其實係因為欣賞麥珮軒嘅精神，希望佢今次捐火炬行動，能夠啓發更多人幫助四川嘅災民。
林大輝最後將投返嚟嗰支3368號火炬，送番畀麥珮軒，令到麥珮軒做善事之餘，都可以保留番咁有紀念價值嘅奧運火炬。林大輝做善事做得咁曲線，今鋪唔只贏咗小小超，仲贏到唔少掌聲㖭。