名模歐陽妙芝和夫婿方時俊（Steven）同樣酷愛小孩，二人火速製造兩名愛情結晶品，分別是年僅3歲的長子方玉丞（Achille）及6個多月大的幼子方玉亨（Atilla），Achille曾因胞弟誕生分薄了母親的關愛而呷醋，經常哭鬧不停，最終妙芝安排兒童心理學家給囝囝上課，令他重拾開朗笑靨，也更愛護弟弟，妙芝認為一家四口和諧的生活，才是世上的無價寶。 撰文：比華利
名模歐陽妙芝自從三年前為商人夫婿方時俊誕下長子方玉丞後，傾盡全力去照顧和愛護囝囝，令她深深感受到揹負一身兒女債的重擔，但妙芝無悔無怨，去年11月再添了幼子方玉亨，她還有意待兩名兒子稍為長大一點時，再計劃添個囡囡，為家庭增添熱鬧氣氛。
與傭人齊齊做家務
妙芝日前帶着兩名兒子到山頂公園玩耍，回想Achille剛出世時，集萬千寵愛於一身，妙芝雖初為人母，但也絕不縱容兒子做「小皇帝」，她接受訪問時說：「我唔准佢亂發脾氣，對工人無禮貌，同埋成日扭計，所以我對佢嘅家教都幾嚴格，就算工人幫佢做完嘢，一定要佢講唔該，等佢養成有禮貌嘅習慣。其實小朋友等於一張白紙，大人做乜嘢，佢都會仿效。𠵱家工人做家務，Achille都要做埋一份，我好鼓勵佢咁做，大家分工合作，佢又可以學吓做家務，順便當做運動，消耗吓精力，我唔要佢做指揮工人做嘢嘅少爺仔。」
當妙芝懷有第二胎Atilla時，她已開始為Achille做心理輔道，擔心他會呷弟弟醋。在醫院初接觸剛出生的弟弟時，榮陞哥哥的Achille顯得興奮莫名，可是當接弟弟回家生活後，看到妙芝把一半的愛分給了弟弟時，他便開始產生妒忌心，妙芝說：「喺細佬嘅第一個月，我留意到Achille有時會悶悶不樂，佢有一次同我講：『媽咪，可唔可以幫我買多個媽咪番嚟，咁樣新媽咪就可以畀細佬，而媽咪就可以成日陪住我。』我嗰一刻聽完好心噏。」
無故哭鬧情緒突變
Achille因為妒忌弟弟，情緒變得不穩，經常無故哭鬧，妙芝說：「記得有幾次，我送佢返學，佢喺學校喊到失控兼嘔吐，點𠱁都唔肯收聲，搞到我好擔心，有啲同學嘅家長見到，就介紹我帶Achille去兒童心理學家度上堂。」
妙芝希望為Achille解開心結，她於是邀請兒童心理學家鍾Sir來家給兒子作指導，她說：「鍾Sir透過遊戲方式開解Achille，佢又用第三者角度同Achille溝通，解釋媽咪一樣咁愛錫兩兄弟，有時都搵埋細佬一齊玩遊戲，漸漸佢冇再喊唔停，𠵱家仲好錫細佬。」
聘請兒童心理學家上堂，價格可會昂貴？妙芝說：「每次上堂一個半鐘，收費幾百蚊，之前，Achille情緒波動大啲，我會上得密啲，一個星期一次，不過𠵱家佢已經解開心結，我就keep住畀佢一個月一次，通常鍾Sir會用個幾鐘同佢哋玩吓傾吓偈，剩番十多分鐘，就會同我了解吓同囝囝相處嘅問題，真係好有效。」
提醒老公賞罰分明
妙芝認為對兒童的教育，家長的身教最重要，由於夫婿Steven因工作需要，不時出埠公幹，與一對孩子接觸時間不多，每次留在家時，必與囝囝玩得痛快，就算孩子犯錯，也不會責罰他，妙芝表示每次見狀都會立即糾正，她說：「父母係子女嘅榜樣，可能我同Steven嘅出身同背景都唔同，佢細細個就去咗外國讀書，屋企家境又唔錯，而我就要捱過苦先至有今日，所以我絕對唔會縱容囝囝，我要佢學習珍惜同擁有，唔准佢浪費。」
妙芝主張對孩子賞罰分明，她說：「我畀囝囝一個盒，做得好就賞佢一個波波，儲夠十個就送份禮物畀佢，但做錯就收番佢啲波波，我好反對體罰小朋友，主張同佢哋講道理。希望同佢哋傾多啲心事，拉近大家距離。」
為了管教三父子，妙芝投訴喉嚨會變得吵啞，甚至睡眠不足，她說：「𠵱家老公好似變咗大仔咁，我對佢哋好嚴格，真係幾勞氣㗎，特別係有咗大仔Achille呢三年，我真係未有過一覺好瞓，我諗未來十年或者都係咁，雖然辛苦，不過我都覺值得，一家人嘅開心同快樂，真係幾多錢都買唔到。」
遊學親子 獲益良多
今年的母親節，歐陽妙芝長子Achille就讀的幼稚園安排了學生們到日本東京遊學，除了弟弟Atilla太年幼留港外，妙芝和夫婿Steven特別抽空陪囝囝出發，趁機共聚天倫之樂。
Achille雖只年僅3歲，但已到過日本遊玩三次，他向記者表示很喜歡這個地方，他說：「我好想媽咪同爹哋再帶我去，下次仲要同埋細佬一齊去。」帶小朋友出遊，父母兼顧的事情較多，亦會比較辛苦，可是看到Achille全程臉上都掛上可愛的笑靨，妙芝的辛勞立刻一掃而空，她說：「其實參加呢個親子團好好，除咗可以畀子女同爸爸媽媽多啲時間相處，小朋友又可以乘機增廣見聞。其中有一日行程，學校安排咗Achille跟老師去咗日本當地一間幼稚園上堂，佢返嚟猛咁講老師教佢摺紙同唱遊，開心到不得了。」
「董事長」唔批放假
學校又安排家長及子女到廸士尼觀光，妙芝說：「Achille都未去過DisneySea玩，佢玩咗好多機動遊戲，好開心。又去咗一個牧場參觀，近距離接觸咗好多小動物，可以培養佢哋嘅愛心。」
妙芝與記者傾談時，提到有計劃與Steven出埠享二人世界，醒目的Achille立即sayno，他說：「媽咪唔准自己放假去玩，除非同埋Achille去。」對於這位家庭「董事長」否決其放假申請，妙芝十分無癮，但轉頭聽到Achille回答：「因為唔捨得媽咪同爹哋離開我。」妙芝即甜在心笑不停。究竟Achille錫媽咪多一點還是爹哋？他說：「唔……我兩個都咁錫。」
小廚師整餅媽咪讚好味
歐陽妙芝未計劃生幼子Atilla時，因不欲長子Achille性格變得孤僻，為了讓他融入群體生活，便安排他參加PlayGroup，不但可以透過遊戲去學習，還可以嘗試學習跟其他小朋友相處，PlayGroup設有不同的興趣小組，Achille樂而忘返。
課程為期年半
妙芝嚴選PlayGroup，現在Achille參加的是一個為期一年半長的課程，每周上課一次，每次都會教導小朋友不同的知識，她說：「Achille𠵱家返緊嗰個PlayGroup幾好，導師會安排唔同嘅嘢畀小朋友學習，佢試過喺課堂學習做廚師，佢哋真係即堂學焗製曲奇餅，佢有拎返嚟請我食，真係好好味。」導師向小朋友講解汽車時，又會給小朋友接觸車胎，令他們對實物有進一步的認識，活學活用，妙芝說：「咁樣嘅活動教學法，好過叫小朋友淨係睇住本書。」
問到Achille喜不喜歡當小廚師？他說：「鍾意呀，因為可以學整曲奇餅畀媽咪食。」
育兒心得：不假手於人
已是兩子之母的歐陽妙芝，在不用開工時，會將全副精神放在兩個兒子身上，落手落腳照顧孩子，並不假手於傭人，所以對於照料嬰孩的每個階段需要甚麼步驟，妙芝都瞭如指掌，去年11月誕下幼子方玉亨（Atilla），經過六個多月的悉心照顧，他已由出世的6磅多，增至22磅，妙芝更把育嬰心得與大家分享：
0－1個月翻臍帶結清洗
妙芝：「BB啱啱出世，佢哋嘅臍帶都未甩，做媽咪就要小心處理，尤其係每日同BB冲凉嘅時候，要份外留意清洗亁淨肚臍位置，記緊要大膽翻開臍帶結清潔，就算見到有少少血水都係正常，唔使擔心，不過動作盡量要輕手啲，否則驚會整痛BB，大概10日到兩星期，臍帶就會自然咁甩掉。」
1－2個月 搽生油去頭泥
妙芝：「BB好容易會出現嘔奶情況，處理得唔好，佢哋會好容易『濁』親，我就建議大家買個墊將BB墊高，佢會舒服啲。有時BB未必肯合作一口氣食晒樽奶，咁媽咪就要有耐性，就算食到一半唔肯食落去，都要先同佢掃一次風，等佢唞吓之後再畀佢食，千祈唔好勉強。BB好多時會有頭泥，可以試吓用燈芯花同生油搽喺BB個頭，輕輕捽吓，再用溫水同洗頭水同佢洗番亁淨。」
2－3個月 防濕疹勤換片
妙芝：「如果BB食人奶，糞便會比較稀，媽咪同佢換尿片就要換得密啲，否則好容易會出濕疹。喺兩到三個月嘅時候，BB嘅骨骼開始長出肌肉，媽咪得閒要同BB嘅手腳做吓按摩，可以將佢反轉趴喺一張亁淨嘅軟墊上，雖然BB個頭太重未必抬得起，但咁樣慢慢等佢『岳』吓個頭，對骨骼生長好有幫助。始終BB身體好柔軟，動作一定要好輕，做呢項運動絕對唔可以喺床，因為太軟會整傷BB。」
3－4個月 濕嘴仔戒夜奶
妙芝：「呢個期間可以逐步同BB戒夜奶，如果BB半夜醒咗要飲奶，媽咪可以試吓畀啖水佢飲濕吓個口，再𠱁佢瞓，慢慢佢就會戒甩飲夜奶，咁大人都冇咁辛苦。但幫BB戒夜奶前，一定要留意吓佢嘅身高同體重合唔合標準先。」
4－5個月 食果蓉添口感
妙芝：「醫生建議呢個時候可以畀BB食吓生果，吸收多啲維他命C之餘，又可以感受一吓吞食物嘅感覺，媽咪可以用匙羮將啲果蓉刮出嚟餵佢，可以畀BB試吓食香蕉、蘋果同啤梨，切記注意啲生果一定要熟透，因為BB抗拒食生嘢嘅味道，所以揀香蕉可以揀啲起晒黑點嘅都唔怕，又腍又香，BB會好鍾意食。」
5－6個月 學習兩手協調
妙芝：「BB要開始學習手部協調動作，可以畀啲玩具佢練習一吓，好似將物件由左手交右手，右手交番左手，做多啲訓練佢哋手指郁動嘅動作。我又會用啲玩具啷啷，喺BB前後左右搖動發聲，隨咗可以令佢嘅頭部配合頸部運動外，又可以訓練佢嘅聽覺。」
6－7個月 食糊仔增營養
妙芝：「BB有半歲大可以試吓食糊仔同粥仔，咁樣佢哋會飽肚啲，最好唔好用海鮮同牛肉煮粥仔，因為驚呢兩樣食物會令BB敏感，可以先用剁爛嘅雞肉同豬肉試吓，同時都可以加入蔬菜或者南瓜蓉，BB就會吸收到均衡營養。」
劉華網站開Blog寫仔經
歐陽妙芝是劉德華的超級粉絲，她甚至影響長子Achille一聽到華仔的歌都會聞歌起舞，她更受偶像華仔邀請到andylau.com網站開blog，她改網名為「芝華事」，網誌的文章主要以她的家庭生活和兩名兒子的成長過程做題材，妙芝說：「我想將囝囝嘅成長寫出嚟畀佢哋兩兄弟大個睇番，都係一個好好嘅紀念，係我嘅一番心意。」
妙芝blog：
http://www.andylau.com/andylau/andylau/blog/postList.do?ownerId=achille
