究竟係一個局？定係一個「焗」？眼見新一輪猛片，全部偏埋Blu-ray，好在星期尾DVD都嚟番隻《江山美人》啫！須知3月先至上畫，香港票房不過不失，相信好多人如筆者當日喺戲院都失諸交臂。慧琳姐演傾國傾城大美人有欠說服力，不過有甄子丹一夫當關，$80當新片睇，抵撐！買唔切FullHDPlasma、新AMP、PS3……？唉！都係睇住DVD先啦！
記者、攝影：朱崇德
史詩大戰打鑊甘
故事格局走史詩式戰爭+愛情片，背景發生在諸侯割據年代，大燕與趙國連年征戰，但一支暗箭歿了燕王，並打破了兩國的平衡。陳慧琳飾演的燕飛兒公主逼於穩住國家局勢，立為女新君，與甄子丹飾的雪虎將軍保家衞國。在外患不斷之際，飛兒又被奸臣胡霸（郭曉東飾）暗殺受傷，後幸得段蘭泉（黎明飾）相救，兩人互相仰慕。可是面對內憂外患，飛兒如何抉擇？
聲畫一般 拍得靚
電影以程小東作導演，動作場面當然有一定看頭！幾幕大場面、重演古戰場，都幾有氣勢，當中不得不讚以盾牌陣大破衝鋒馬車，設計頗有心思，儘管有人會話有點不中、不西。電影聲畫表現以港產DVD嚟講都算唔錯，雖然聲畫平均Bitrate只有7MB/Sec，可能拍攝時燈光做得好，每件盔甲感覺都係玲瓏浮凸，當中亦不得不讚創作及美術總監奚仲文設計得花心思，絕對有將《滿城盡帶黃金甲》比下去之勢！
一夫當關 甄子丹
演員表現都要來個論功行賞！老實講，陳慧琳、黎明演技真係可以用由頭至尾一個表情嚟形容，導演將整劇拍得感覺自然流暢，已經好有功力。陳慧琳武戲打得落力，有點驚喜；至於黎明就只可以「儍姑三式」形容，招招Repeat又Repeat，連程大導呢位影壇黃藥師都幫唔得幾多！甄子丹當然最有睇頭，頭場大混戰只係前菜，煞科斬瓜切菜、力敵萬軍，老旺通街都用呢段嚟做Demo，就知佢幾有殺傷力，只嘆電影情戲太多、相對武戲變弱。
江山美人
價錢：$80
音效：dts5.1、DD5.1
語言：粵語、國語
碟種：DVD9
片長：96分鐘
查詢：DVDPro（23326326）
地址：旺角奶路臣街6E德發商場地庫B4舖
