「哥魯卡沿右路推過半場，畀番中間嘅莫廸歷，對面德國嘅芬寧斯迫到，莫廸歷順住個勢，通咗芬寧斯坑渠，再望下有冇隊友走位？腳面一彈，穿過晒德國條防線，靚波！左路入楔嘅柏歷空晒，冇越位！搞掂！」
咁樣，都幾好吖！
睇波，睇技術好過睇戰術。睇技術，最直接嘅官能刺激，容易吸收；睇戰術，要用腦去領略。時已夜深，軟癱梳化，對住個畀盡都係16:9嘅螢光幕，成個球場，只係睇到有個波出現嘅嗰三分一範圍，仲要用我哋業餘嘅足球腦袋，去領略人哋嘅專業戰術，我想瞓陣先。
控球在腳嘅球員，突然嚟一個連你都呃埋、出其不意、妙到毫巔嘅盤扭、傳球、射門，睇到你自動自覺「嘩！」一聲；一支球隊入面，有一、兩個有能力做到以上能人所不能舉動嘅天才球員，嗰種希望快啲有隊友傳波畀佢、等佢表演嘅期待，最有娛樂性又頂得眼瞓，莫過於此嘞啩。
德國法國意大利等歐洲傳統勁旅，永遠畀人睇高一線，但就大部份時間都畀唔到人滿足，因為佢哋場場贏1:0、2:0嘅霸氣，真係要用力去感受。今個歐國盃決賽周冇英格蘭，要每場波都有即食又投入嘅感覺，克羅地亞幾好㗎！
文：華度
熱捧「雙牙」，冷敲瑞士，克羅地亞都贏，贏口碑囉！