「時裝是一件關於有型的事。」Wyman（黃偉文）提高聲調。寫時裝書夠型嗎？他出國時職業一欄填「作家」我覺得已經好型，奈何愛挑剔者總會話係人都可以出書，bloggers都得，無寫blog的Wyman好似未夠型。去巴黎睇show夠型嗎？但又唔係每年12月坐定定等收invitation，而要日日check住有無入場飛，型唔晒喎……
Wyman第三本時裝書《生於天橋底》見街，明知講緊fashionshow嗰條天橋，偏要左派批判式地特登30oC着住件鮮紅BurberryProrsumtrenchcoat在人來人往的行人天橋影相做宣傳，「時裝圈子應該似街坊pub，乜人都入得。」原來撈埋這種世界大同先可以叫有型。
記者：梁俊鵬
攝影：梁細權
型事一：做個豪華乞兒
起初約了Wyman在西環一條行車天橋影相，等等吓，攝影師已經質疑：食字我們玩得多，斷估他講緊那種天橋不會是這種企一下都會整花對鞋的石屎地……Wyman可能怕我們亂估，一坐定定訪問，就先解題（雖然他覺得此舉屬「唔型」的一種）。
「其實你講得無錯，兩個意思都有。我都係出身於草根，將來touchwood要瞓天橋底，要淪落到去後巷執嘢食，我會同時執枝花同蠟燭食番餐candlelightdinner，時裝於我係對生活情趣的一種追求，即使拎走晒我所有的健康同財產，都係不可缺少的。」
「還有另一個真相，下集《死在更衣室》先係我想要的那隻左腳鞋，為咗湊夠一對先有《生於天橋底》。唔好話我懶，再懶啲我可以直接叫本書做《BuymeaSunday》，起碼個個星期有睇這個專欄的讀者自動對號入座。」
雖然睇Wyman寫嘢bitchy又不失幽默，精采圖片又例如可以從4,000幅欣宜照片與100幅AnnaSui單頭照中找出類似色調與韻味，配合「時裝界人有相似」主題的《蘋果》資料室撐住。但出書始終有個封面，否則讀者真係夠膽死儲舊報紙算數。今次就有朱祖兒找來日本四眼妹插畫師MizuuchiSatomi，以簡單筆觸畫出Viktor&Rolf、McQueen、Karl爺的神髓，當然還有戴黑框眼鏡、一把鬍鬚的Wyman份，Simpsons以外玩時裝人的漫畫算是第二次？「朱生是有主見的人，通常他都會用扮有商量的方法通知你。但找得他幫手，就要100%相信他。就連一年只有通一兩次電郵的Winifred（黎堅惠）終於都忍唔住send了一個email來，話她都覺得這個插畫師好有趣。以黎小姐的眼光，我好有可以無喇喇執到寶的感覺，還要是一個未紅的名牌﹗」
型事二：宣傳着嘅衫貴過我賺嘅版稅
在香港地出書，為咩？見Wyman懶懶閒，05年尾出書到現在都叫有兩年幾，散文集《俗》賣到第九版又點？可能養飽自己都未必夠（見他買cupcake都講究十足），何況他每星期有邊篇稿無提過買靚衫？
「每次都係蝕住出書……香港版稅可以有幾高吖？唔同在NewYork，只要你好好彩，本書上到《紐約時報》暢銷書榜第五位一個星期，賺到的錢夠我在長島買間屋，下半世唔使做，可能連個孫都唔使返工……就連對上幾本書，都賣到一個叫做『令我感激』的銷量，其實都唔夠我為宣傳而着的衫貴！我已經好懶，每次都只接受不超過十個訪問。但實情係，出書賺來的錢連置裝費的一半都無。今次咪當幫補吓我找卡數，搵個場合來俾我着誇張嘅衫囉。」我好市儈咁計住，件BurberryProrsum亁濕褸，還有Dior皮鞋眼鏡……起碼四、五萬，做十個訪問，無番幾十萬置裝費還得了？「又唔可以咁計，買衫的錢對我來講係已出之物，30歲前我都會24、7地dressup，好驚被冷落，（咁似《浮誇》的歌詞？）現在我都過咗鍾意俾人『望我望我望我喇』的年紀，反而鍾意懂得收放，今日我出嚟影相，會想着得好靚好出，但我平時都想有『我唔想俾你見到我』的日子……」
型事三：去巴黎睇show，並唔係咁型嘅事
睇開Wyman專欄的讀者，多少都係鍾意他一件簡單的事都可以用幾百字寫吓八卦嘢，何況係殺入時裝界戰線，飛巴黎睇show咁大陣仗，就算個show幾悶啲衫幾唔靚，從他的文字演繹出來總饒有趣味，搞到大家都認為「去巴黎睇show係時裝人的最終目標」！點知Wyman一盆冷水：「如果你要引證你對巴黎fashionweek的幻想，最後只會落得『原來又咪係咁』的收場。」去過，先有資格講得咁有型吧。
「大家覺得睇show型，係咪型在每年12月就收到品牌的invitation，叫你下個月嚟巴黎喇咁？殘酷嘅事實係──你覺得人哋品牌PR會識得我這個在香港寫稿嘅人咩？我都係用雜誌的名義去請求採訪，他們就會以寄邀請卡給你作回覆，但通常這個交換戒指的承諾到最後一刻才會發生。而且明明早一個星期甚至早一日，他們都仲話『入場飛方面應該無問題』，但可能你去到現場先無得入！要我一日睇幾千套衫唔辛苦，但等飛這種患得患失先令人窒息。甚至你坐十幾個鐘飛機，拎住七箱靚衫去到，可能都有人冒認你個名拎咗你張邀請卡坐咗你個位……時裝係關於有型嘅，如果大家有這種追求有型的心，就會自律，做少好多核突的事。」
襯衫原則
Wyman的襯衫原則就是「無原則」。不嬲扮靚同舒服不能同時兼得，他認為任何人都有本能去襯一套正正常常的衫，但他就以幾個月前LVparty的衣着作例講解他的襯衫方式。「我近來好積極諗自己30幾年來，有咩造型屬少試，結果想到Americanalook，原本去party，我着了件條子blazer襯短褲和皮鞋，出門時照鏡，太工整喇，於是換了對拖鞋（BirkenstockDavos）。所以我的襯衫之道就在於先襯正常look，最後檢查時換上一兩件看似唔襯嘅配件，感覺會original一點。」
不能寫blog
沒車牌，填到一首《人車誌》，所以男人寫得到女裝，也很合理。「寫女裝都無太大壓力，因為我係用宇宙通用的購物者角度去寫。我覺得時裝是一樣令我快樂嘅事，要像一間街坊pub，人人都入得。」眾人皆醒他獨醉，身邊家人朋友都不是可以約出來下午茶傾時裝之輩，Wyman就寫專欄以文會友，但要他寫blog就沒可能：「我唔係咩傳奇人物，一個星期內發生，而有可以寫得出文章的大概就只夠我應付兩個專欄，料就只有咁多，無理由開到成個泳池咁大煲湯，一定唔好飲。」《生於天橋底》就是這一味濃湯吧……
Wyman旅遊造型：
Wyman講明，這些相片不是他的個人時裝展，原來他現在才知道自己沒有那些站在羅浮宮或巴黎鐵塔前舉起V字手勢的旅遊相。
今季推介品牌
1.「Burberry今季將傳統trenchcoat以滑浪衣布料做出來，我着那件trenchcoat，一點都不焗身，顏色又靚。」
2.「又係一個我等咗幾季，終於有靚布料加顏色的品牌。尤其那些阿爾蓋達feel的圍巾最得我歡心。」
3.「敢喺春夏要人着三層layers咁違反自然的設計師無幾個，totallook是對創造者的尊重，我第一次咁着是在只有6℃的巴黎！」
4.「每個男人都應該有一對。Visvim的鞋我有好多，Christo是唯一一對我覺得靚，但唔啱我的鞋。但上次去北京無嘢買實在唔安樂，結果在shine買咗對，但未着過。即將會出的民族彩帶christo可能是我會着出街的突破。」
