梁詠琪（GiGi）前晚代表美亞娛樂及天下影畫，將《青苔》為四川地震賑災首映籌得的10萬元善款交予中聯辦，眼見大班藝人陸續到災區探訪，GiGi表示探訪已成為傳媒焦點，她為尊重救人也尊重慈善人員，不想妨礙別人救援，故考慮稍遲才去災區幫手，主力為四川建學校及孤兒院。
梁詠琪、余文樂、冼色麗、李曼筠（動漫Maggie）及邵音音等，前晚在旺角出席《青苔》賑災慈善首映禮，籌得10萬元善款，即場由GiGi代表美亞娛樂及天下影畫，遞交支票予中聯辦代表。
談到近日大班藝人到災區探訪，GiGi說：「我尊重救人同慈善人員，但唔好阻住人囉，我會過一段時間先去，能力做到嘅都會去幫忙，𠵱家好多人踴躍去災區，成為傳媒焦點，我遲吓先去或者睇吓其他地方要幫忙嘅就會去，最好叫啲醫生去幫手。」GiGi又謂打算在四川建學校及孤兒院，她說：「我細佬做土木工程，會叫佢去幫手，我媽咪之前都喺陝西同陝北起學校，過去幾年做扶貧建校嘅嘢，會keep住做。」
擔心被誤會
另一方面，余文樂早前因不滿《青》片宣傳海報上的語句有誤導色情成份，曾表示不排除不為電影宣傳，他前晚說：「我哋溝通咗，我作為演員唔應該干涉，只要拍好戲同做宣傳，其他嘢控制唔到，人哋做電影宣傳先專業，有經驗，我冇咪要信佢哋囉，我都唔係咁強硬啫，搞清楚件事，可能係誤會，𠵱家市道唔好，要盡量幫手，唔可以太自私。」問到可擔心被人誤會擺款？他說：「我唔想俾人誤會我係咁嘅人。」
「我未叫過雞」
前晚樂仔被問到如何投入片中的貪小便宜警察角色時，他說：「戲裏面叫雞唔畀錢，我未叫過雞，唔知叫雞係點，要問導演。」導演郭子健即緊張地說：「我冇叫過呀，做research咋。」樂仔後來幫口謂：「導演同佢女友好好㗎。」
此外，邵音音前晚帶着演藝人協會的1001元撫恤金及她自己的1001元帛金，交予汪禹的朋友轉交汪的女兒，她說：「所有演協會員過身都有1001蚊撫恤金，汪禹過身我都係睇報道先知，佢過咗身幾日後，佢老婆同個女去過演協幾次，但冇人返工，後來佢哋透過中間人打畀我，話想攞撫恤金。」邵音音謂汪妻是堅強的女人，環境不好也不會要人幫忙，只是知道演協有此福利才去領取，她又謂汪禹骨灰將運往加拿大，由其父親及妹妹處理。
採訪：魯萍
攝影：仇志德
