關智斌（Kenny）和張敬軒的斷背情疑幻疑真，究竟二人有甚麼關係？Kenny前晚亮相《蘋果》網站直播節目《娛樂開CHAT》，被主持懷鈺大逼供，他說：「我哋係好朋友關係，因為佢好寂寞，喺香港冇朋友，佢自己一個人住成千呎嘅屋，就更加寂寞，佢好鍾意請人返屋企食飯。」Kenny自爆本周才到過軒仔家，不過每次總是大班朋友去開party，Kenny大讚同性密友：「佢係一個幾好嘅傾訴對象，香港人比較急功近利，同物質主義，佢有香港人冇嘅特質。佢好愛國，同埋佢對朋友好無私。」大家可以登入《蘋果》網站 http://ent.appledaily.com隨時重溫節目。
採訪：葉雪
攝影：仇志中
關智斌髮型：Gordy（Orient4）
懷鈺髮型：MattChiu（XENTERJUT）
拍戲冇得揀角色--阿謙
阿謙：之前你拍過一套電影叫《黑道之無悔今生》，咁你仲有啲乜嘢角色想演嘅呢？
關智斌：我好多謝你有睇過呢部電影，應該唔會有好多人睇過，因為唔係好多間戲院做，呢部戲遲啲會喺台灣上，其實呢部都算係台灣戲。我諗我冇得揀做乜嘢角色，因為有導演搵我拍戲，我都會盡我最大努力，乜嘢都去嘗試。
主持：咁你有冇睇過一啲戲，然後好想演戲入面嘅角色？
關智斌：都有㗎，我記得我睇《妄想》，我好想演阿Sa（蔡卓妍）嗰類型嘅角色，好有挑戰性，即係一啲精神分裂嘅角色囉。
拒扮猙獰保俊臉--細兜
細兜：Kenny你話嚟緊會出大碟啦，咁會唔會行乜嘢路線，例如曲風呀？會唔會man啲呀？咁頭先你話想拍一啲精神分裂嘅角色，咁你可唔可以示範吓個猙獰樣嚟睇吓啦！
關智斌：其實呢幾年都係走一啲少男啲嘅路線，我唔會特別行man啲嘅，因為都要配合真實性格同年紀，𠵱家我都27歲，所以我唔會再少男情懷喇，不過我要保持新鮮感、神秘感，所以我唔會透露住嘅。而個猙獰樣，因為我啱啱拉咗面皮呀，所以要靠特技化妝，所以你都要遲啲入戲院先睇到喇！
邀阿B鬥色士風--Phoebe
Phoebe：Kenny，你心目中嘅演唱會係點㗎？同埋有乜嘢賣點？
關智斌：我真係有諗呀，我成日做gym時，都會諗吓個演唱會rundown係點，第一part會唱一啲自己嘅首本名曲，例如《眼紅館》、《死性不改》；第二part會吹色士風，因為可以玩啲bigband嘢嘛；第三part想清新啲，睇吓到時學唔學得切鋼琴或者結他咁啦；第四part想係快歌，請埋Steven（張致恆）一齊回味Boy'z年代嘅快歌，最後就唱最新派台歌。
Phoebe：咁除咗Steven之外，仲想請邊個嘉賓呀？
關智斌：呢啲公司會安排喇，一定會有師弟妹出席喇，不過我自己想請B哥哥（鍾鎮濤），因為可以同佢一齊吹色士風嘛。
