幾十名傳媒朋友，應該全部都會參與奧運馬術採訪嘅，喺五月二十四日星期六雲集屯門公眾騎術學校為馬術知識補習，幫助未來採訪工作。上午參觀馬房，聽書後到一間酒家飲茶吃飯，下午就冇冷氣享受咯，二十六、七度氣溫，烈日當空下，坐在騎術學校大沙圈外，睇香港馬術騎手示範。原來馬匹出場前，需要二十至六十分鐘熱身，練習各種不同步伐，騎手好有耐性咁騎馬踱步，並且穿上西裝上衣，戴上頭盔，有乜法子唔成身大汗吖。
騎術學校總教練駱柏特親自示範盛裝舞步，因我哋上午睇過影帶，知道舞步嘅主要內容，故此叫做識得欣賞。總教練騎嗰匹馬以前係蘭尼馬房隻「好快趣」，專家話馬術賽嘅馬越老越好，十歲叫做年青，呢隻「好快趣」應該有十幾歲喇啩！總教練雖然唔係奧運金牌選手級數，但能令馬匹好輕鬆咁完成各種必需動作，後肢旋轉都可以做到一半以上，應該係香港區一流高手咯。然後係障礙跳欄示範，有好手利子厚、何安妮、駱柏特等五位。場地障礙賽跳欄講求速度、時間控制、跑線設計、馬匹乖巧以及騎手控制馬匹嘅技術，各記者親自到沙圈內沿各項障礙行一個圈，方知其中巧妙。
示範完畢後，各人領取「畢業小金牌」，預備騎馬，騎木馬親身體驗之際，已經係五時過外，唐司長翩然而至，為大家打打氣及合照。眾人要佢講幾句，司長即席發揮，大意話：「香港市民對馬術嘅認識，當然不如跑馬，請大家到此上番一日雞精課，好事也。嗱，香港記者好拼搏，明明講開馬術都會問我副局長之事嘅，今日請大家專注於馬術，好唔好？」眾人大笑，簇擁唐司長去馬房，至於上馬體驗一回事，大家好似暫時唔記得咗，因為萬一行家在馬房內影到一張司長趣怪相片而自己因為去咗騎馬而影唔到，容乜易返到報館畀上司詐型㗎。司長又真係識做，近距離與馬匹接觸，於是記者影個不停，有功課交！左丁山就趁此機會急急腳鬆人，因為仲要開車返屋企沖涼，晚上到快活谷馬會參加婚宴也。