黃家強昨日在九龍灣出席「黃家駒海闊天空慈善拍賣版」發佈會，由今日起至下月8日會於yahoo拍賣家駒12吋figure公仔，限量40個，每個底價$2,500，善款將撥捐苗圃行動。家強說：「我諗住用1萬蚊拍賣1號figure。」
最緊要幫到人
家強借出家駒遺作《海闊天空》做賑災活動主題曲，有指曾志偉事前沒通知他借歌，又沒採用家強填的詞，更令他淪為掛名監製。家強說：「我冇所謂，最重要幫到人。我係收到演藝人協會通知借歌，叫我填埋詞，佢哋諗住我熟首歌，所以搵我做監製同啲歌手溝通，後尾佢哋handle到，我咪交番畀其他人做。」他續說：「一直都冇人話一定會用我填嘅詞，我覺得用唔用都冇所謂。」
採訪、攝影：何慧斯