薑，幾時都係老嘅辣！噚日TVB舉行周年股東大會，上至主席邵逸夫，下至公關阿頭，通通都俾記者追問有關賣盤畀碧桂園楊國強嘅傳聞。六叔即席示範面對傳媒內功心法，就係化身TVB吉祥物，扮聽唔到同埋玩封嘴，絕對唔會嘴藐藐兼開聲片人，尤其係嗰啲理論上有份出糧畀班高層嘅小股東！
全程封耳兼封嘴
早排有傳六叔病重，出院又入院再出院，到近排現身捐一億元賑災，噚日六叔就由六嬸方逸華扶住出席主持股東大會。雖則由九龍香格里拉門口落車去到一樓股東會現場，六叔行咗超過10分鐘，但眼仔睩睩嘅佢依舊精靈，面對記者即刻使出「我聽你唔到」絕招。至於望落至多60歲嘅六嬸，舊年爆響口話六叔諗緊退休之後，今年忽然玩封耳同封嘴，一粒字都冇講過，似乎呢一刻真係無聲勝有聲。
董事局成員個個跟大隊封嘴，反而最出位嘅係廣管局前主席、現任電視廣播副行政主席梁乃鵬。有個小股東想問問題，佢最初叫人一陣先問，但到後尾又捩橫折曲反寸小股東，質問做乜頭先唔問，不過見群情洶湧最後梁乃鵬都坐低應酬吓。
梁乃鵬片小股東
小股東問乜？第一條係年報入面點解有條1.35億嘅減值撥備唔清唔楚，連集團總經理李寶安都跳出嚟幫手解話，話條數係投資收費電視所做嘅審慎撥備，仲要係暫時性嗰隻。第二條問題就關於賣盤傳聞，小股東話擔心點解要賣畀一個唔夠錢嘅人，會唔會係李澤楷當年蛇吞象收購香港電訊嘅翻版，喺呢個moment，會場剩低嘅人都全神貫注等爆料，但梁乃鵬一開口就起勢片人：「你呢個問題唔適合問，我亦唔需要答你，呢個唔係講緊管理層啲嘢，講緊唔係業務問題，大股東點處事唔係管理層可以管到……」八方心諗，喺大股東面前，梁乃鵬亦只係大𡃁一名，佢片人都係以攻為守啫，或者，佢其實都好想解開小股東呢個疑團，但自己都搵唔到答案都未定呢。
mailto:[email protected]