《奪寶奇兵》新片上映，那首耳熟能詳的主題曲再次響起，並與好多電影一樣亦趁勢推出遊戲版。而今次LUCASARTS更與LEGO合作，將遊戲中的角色物件LEGO化，這個玩法之前亦曾用於《LEGOStarWars》，有不俗評價。今次新作就可讓玩家同時享受到玩LEGO同尋寶樂趣。
記者：許福合
激似鍾斯博士
不要以為將電影中的角色變晒LEGO就唔似，其實遊戲每個LEGO角色都係依足幾名主角而設計，取其樣貌衣着特色，有睇過電影就一定會認得。其中激似必定要數鍾斯博士，雖然新上畫嘅佢老咗好多，不過因為遊戲內係以前三集《奪寶奇兵》內容作為遊戲背景，所以鍾斯博士仍然咁年輕，加上一頂牛仔帽，勁似！
遊戲內分成三張地圖，各自代表前三集《奪寶奇兵》內容，必須完成地圖內容才可打開下一張。玩法其實同電影相似，要在途中收集收藏品，亦要有必需工具；再加上不時會出現電影中的經典對白，玩得特別過癮。
皮鞭作武器
除了主角，其實場景內大部份物件都會LEGO化，所以遊戲主要使用3D環境。而人物雖然係LEGO，但竟然都有表情，例如鍾斯博士那個招牌笑容，只要加點想像力，都幾似㗎！至於佢喺遊戲內最常用武器係皮鞭，用來打人之外，仲可以當作道具使用，例如繞過障礙物、抓取物件及按動控制桿等。不過電影內鍾斯博士都唔係一個人就可以過關，所以遊戲會安排一個拍檔畀佢，部份關卡需要利用到拍檔嘅特別能力才可通關；最特別仲係這個拍檔可以由電腦控制，亦可找個朋友操作雙打，合力過關。
網上也奪寶
遊戲基本分為故事同自由模式，故事模式會依據電影劇情進行，而自由模式中，就可控制唔同角色，但必須已於故事模式中解鎖。另外，玩家可以乘坐多種交通工具，如曾在電影中出現的電單車及礦坑車等，都係依電影而設計。最後要一提，此作可以於各大遊戲主機玩到外，各位更可以到其網頁尋寶！玩法簡單，只要瀏覽網站內容，當見到寶箱就用滑鼠點擊即可獲得分數，分數可以用來下載牆紙、Stickers、電話鈴聲等等，相當有趣。
Profile
主機：XB360/Wii/PS3/PS2/PSP/NDS
廠商：LUCASARTS
類型：動作
推出日期：6月5日
人數：1-2人
官方網站： http://www.lucasarts.com/games/legoindianajones/
