噚日係開心果沈殿霞（肥姐）逝世一百日，佢嘅囡囡鄭欣宜、生前好友陳淑芬以及陳太個仔家豪，一齊去寶福山寶禪堂拜祭肥姐。陳太同家豪大約喺上晝11點去到九龍塘劍橋花園會合欣宜，然後一齊坐陳太車去沙田寶福山，雖然當時落住大雨，但就無阻欣宜拜祭媽咪嘅心意。
細心抹遺照
欣宜着住綠色低領T恤同戴住黑超，其間一直唔太願意記者採訪，但仍有應記者要求影張相。喺外國讀書嘅欣宜拜祭時都識得除低眼鏡上香拜神，另外又搵人幫佢化寶。至於陳淑芬就好用心抹亁淨肥姐張遺照，眾人最後逗留咗大約一個鐘就離開。
另外，陳淑芬今年為張國榮舉行紀念音樂會，原本打算喺內地繼續搞呢個騷，但係最近四川發生大地震，唔知佢嘅計劃有冇變呢？陳淑芬話：「呢啲嘢遲啲先再算啦。」