港大索女陳巧文拎住支雪山獅子旗一舉成名後，最近冇晒消息，不過佢好快會重出江湖，喺6月3號同4號帶隊示威同派傳單，抗議中國違反聯合國人權公約、要求平反六四，同埋為四川災民籌款。今次由於佢位老外男友唔喺香港，示威嗰陣得幾個朋友陪住，不過班護聖火憤青都返晒大陸，睇怕佢人身安全唔成問題。
陳巧文近排原來忙於喺facebook回覆支持佢嘅市民留言，佢仲開咗個event呼籲市民出席平反六四集會，不過呢個event噚日無端端又俾網站刪除咗。陳巧文話佢約咗一班朋友喺6月3日下午約4點半去中聯辦抗議；6月4日就會去維園派傳單，等市民知道中國政府做過乜嘢違反國際人權公約嘅事情。