𠵱家AV發燒友、IT人好識嘆，都好鍾意喺屋企邊飲紅酒邊聽歌睇戲。好似電腦商會會長張耀成（Jacky），屋企一早裝咗投影機睇數碼高清廣播節目。佢話開住大投影睇戲，再飲番杯紅酒，睇戲投入啲，又可以減壓。
Jacky仲寓娛樂於工作㖭，貴為油麻地MK1數碼廣場嘅行政總裁，個場賣電腦、影音產品一啲唔出奇，今個月中佢引入一間香港美酒薈，仲賣埋酒。小藍早幾日踩上門，順手開支紅酒問吓Jacky點解咁有創意。佢解釋話，既然咁多AV、IT友咁鍾意飲紅酒，咪等佢哋喺同一個場一次過買機買酒囉。父親節啲客喺雷射影音買機仲有紅酒送，遲啲又會搞IT研討會，「大家摸住酒杯底傾，好feel啲」。
今晚試完機再試酒
Jacky又話，美酒薈唔單止賣酒，仲賣埋酒櫃，總共有8個著名品牌，由高檔嘅法國品牌如EuroCave等，價錢萬幾蚊至逾10萬，以至普羅大眾啲美國品牌White-Westinghouse等，價錢千幾蚊起。以前一般飲家習慣飲一支買一支，𠵱家啲紅酒升到嘭嘭聲，啲客試啱好嘢會買成箱，酒櫃需求激增。
美酒薈今晚6點搞咗個試酒會，以50蚊嘅優惠價可以嘆到法國波爾多紅酒，同埋酒評家RobertParker畀咗93分嘅CapeBarrenOldVineShiraz2005。試完機，再試酒，又幾盞鬼喎。
逢周五刊出