近日俾副局長單嘢搞到頭都大埋嘅煲呔，噚晚難得有心情去睇錶，仲同唐唐、鄭經翰圍埋雞啄唔斷㖭。
中環ifcmall近年冒起成藍血人士御用商場，勞力士專門店噚日喺度正式開幕，城中唔少政商名人都畀面捧場，煲呔就帶埋老婆一齊參加酒會，唐英年則單拖赴會。
煲呔一入場就俾「煲呔針」鄭大班拉住密斟，唔知大班係咪解釋番點解冇留喺立法會表決營養標籤法呢?比煲呔遲咗約10分鐘先到嘅唐唐亦隨即加入，三個男人傾到指手畫腳，狀甚興奮。
講到最興奮嘅就似乎係東亞銀行主席李國寶，佢唔單止帶埋老婆同大仔李民橋出席，李國寶對啲手錶好有興趣，仲拉埋店舖職員到舖外指住櫥窗入面隻錶猛講，唔知佢係咪睇中咗想買番隻呢？