林海峰（Jan）前晚於紅館舉行首場「ENCOREALWAYSON林海峰是但噏求其大合唱PARTII」，阿Jan一家、草蜢、鄭希怡、薛凱琪、張達明夫婦、林建岳及谷德昭等人撐場。阿Jan將PARTII的講唱會內容加入一半新元素，甫開場他便為四川災民打氣，更希望星期日義演可以將歡笑帶給他們。於前晚的講唱會中，觀眾反應最熱烈的是「永遠林海峰追思會預演」、講粗口及講爛gag。不過阿Jan透露追思會講及自己身後事被母親責罵，他更笑言：「咁我仲在生㗎嘛。」 採訪：李珮洳 攝影：陳志嵐
四大精采位
拒化死人妝
阿Jan為自己舉行「永遠懷念林海峰追思會預演」，他說：「死人化妝化到成個蠟像，親人會為佢着晒生前最鍾意嘅衫褲鞋襪，但又用張被遮住晒。火化時唔好叫親人㩒掣，應該價高者得500蚊畀仇家㩒。我個電視特輯播番做過嘅電視、電影同MV，商台會整日播我嘅歌，《叱咤》頒獎禮要等我頭七尾七先搞，我唔會揀死人化妝，我寧願去曬燈，要死得健康。」
超級爛Gag王
阿Jan表示現今社會有很多吹水精及爛gag王，當二人碰面會「互片」，他一人分飾兩角你一言我一語：「你𠵱家撈乜呀？」（Nobody囉！）「咁你識啲乜呀？」（我乜都唔識，只係sickleave。）「你知唔知巴斯光年殺咗條龍變成乜呀？」（撒隆巴斯。）「你又知唔知乜嘢動物最鍾意聞底褲呀？」（豹紋底褲。）「我趕住去嗰邊，你知唔知要過邊條橋呀？」（ThankYou呀。）
笑聲送四川
阿Jan在開場時談及四川發生地震，指作為中國人應該出一分力，他說：「我希望將歡笑傳開去，我想見到內地小朋友、失去親人嘅人、同埋中國有番笑容。今次地震拉近同胞嘅距離，不分左中右，就算曾憲梓唔做火炬手去做特首，我估大家都唔會反對。奧運應該最多人支持中國，劉翔攞硬金，馬拉松就派溫總（總理溫家寶）去跑，成個四川畀佢行勻晒，佢仲唔係No.1。」其間阿Jan更模仿陳志雲傳聖火的跑姿。
自創新粗口
阿Jan強調所有演唱會的PartI,II都是一樣的，他說：「容祖兒演唱會PartI唱過啲歌第二次都唱番，你哋唔會鬧佢又唱，不如你叫佢唱晒何韻詩啲歌。」其後阿Jan又在講唱會中爆粗，他說：「黃子華同詹瑞文一講粗口大家都好好反應。」他指小學時講粗口被訓導主任教訓一事，他說：「我有次見到巴士飛站就講X你老母，訓導主任解釋畀我知巴士係冇老母㗎，下次個車字代替，我再見到巴士飛站就講『車你老母』！」
