奧運馬術公司喺屯門公眾騎術學校辦傳媒工作坊，有成五十幾人參加，情況熱鬧。記者大哥大姐平時放工時間已近午夜，上星期六一早就要起床到九龍塘理想酒店旁等上旅遊巴士，直奔屯門蝴蝶灣，真係幾辛苦吓，難得佢地有專業精神，為準備報導奧運馬術賽做好功課，到時唔會冇料充炮艇。
馬主N叫埋左丁山去學嘢，因佢知道左丁山對跑馬就知好多，對馬術係門外漢，平時識睇資料，睇BBC（有一個體育節目講馬術體育，幾過癮），毫無實戰經驗，係唔夠嘅。第一次去屯門公眾騎術學校，因唔熟路，錯過入口，竟然揸車去到內河碼頭先至掉頭，好彩記住喺「美樂樓」對面，搵到入口，冇遲到。十時正就各路人馬齊集，立即開波，分為兩組，一組聽講；另一組到馬房參觀，睇如何護理馬匹，如釘甲、飼料等。聽講者入講室，首先由奧運馬術公司副總裁講今年奧運馬術比賽之安排、組織、架構、比賽場地、合作單位等等，然後由馬術專家講述（一）盛裝舞步（Dressage），（二）障礙跳欄，（三）三項賽（Eventing）嘅簡單介紹，話簡單啫，都講解成個鐘頭，仲有馬會董事利子厚以香港馬術協會推廣委員會主席身份講馬術賽之分類、級別等等，內容多到抄都抄唔切，好彩所有講者內容簡介都印好晒，有得派。
聽完先知道馬術比賽甚艱難，要求之高，超乎想像。譬如三項賽之中，騎手要做齊盛裝舞步、障礙跳欄及越野障礙賽三項，總分最高者勝。識一項都好難啦，何況識齊三項？專家播映上屆雅典奧運金牌冠軍之比賽情況，荷蘭選手贏盛裝舞步金牌，騎手穿燕尾禮服，戴高帽，騎在馬背上，挺直腰，保持笑容，好似冇乜動作，但能夠指揮隻馬按音樂節奏做齊各種高難度動作，如半橫步，後肢旋轉，凌空換腳（或空中變腳）等等，人馬合一，融為一體，睇到我地目定口呆。專家話，有人學馬術學足一世，都冇法子指揮隻馬做到後肢旋轉（Pirouette）呢項動作。上午聽課，下午到內圈睇馬術示範，精彩咯。