唉！相煎何太急呢！兄弟一場，大佬有嘅，細佬想要都好正常，難怪豪門大族成日發生爭產奪權事件。八方唔係講緊「郭家大事」，只係睇到香港壁球手麥珮軒捐出火炬義賣賑災，「小小超」李澤楷加入競投有感而發啫。
麥珮軒係香港傳送奧運聖火火炬手之一，目睹四川地震災情嚴重，上星期割愛捐出火炬、運動衫、鞋及頭箍，透過商台節目《左右大局》義賣，據了解小小超得悉後好有興趣，透過電郵出價競投，最高出到170萬元。
競投火炬被截糊
小小超早前以私人名義捐出2,000萬元賑災，出多百幾萬做善事真係濕濕碎到極，加上佢冇份做火炬手，唔似得大佬澤鉅咁有份傳火炬，想擁有支火炬惟有外求，競投麥珮軒支火炬，真係一舉兩得。
澤楷想「摘炬」而回點知失之交臂，可能同個「炬」字相剋，噚日遭一位出價180萬元嘅蘇小姐截糊。八方收到風，蘇小姐係一名城中名人秘書，日前提議老闆競投火炬，老闆話如果下屬籌到一萬蚊，佢就包底179萬元競投，齊齊賑災。小小超出價再多都唔會有問題，但噚日有關方面卻聯絡唔到佢，唔知佢係咪「志在bid得」，結果以10萬元之差飲恨，「摘炬」失手。
麥珮軒話火炬以180萬元成交係好好價錢，連同傳送火炬時着嘅運動衫、頭箍同運動鞋，總共籌得182.6萬元，佢話好感謝善長支持，希望筆錢幫到災民。小小超今次競投雖然空手而回，八方相信佢會繼續幫助災民，有冇火炬揸手冇所謂。
180萬全城最高價
其實國內都有唔少火炬手義賣火炬賑災，麥珮軒支火炬以180萬元成交係暫時最高價，其次係福州火炬手李珊珊支火炬，賣到109萬元人民幣，其他火炬手都有意捐出火炬拍賣，小小超仲有大把機會做善事賑災，睇啱先出價都得。香港幾大華資大地產商都有第二代做火炬手，四叔派出大仔家傑做代表，唔知細仔家誠想唔想要番支留念？郭家有三兄弟，但僅得炳江一個火炬手，好在有老太主持大局，相信唔使為咗支火炬再傷和氣。
mailto:[email protected]