噚日，係香港種族歧視光輝嘅一日，亦係特區多元文化黑暗嘅一日。因為噚日，立法會以一票之差，令營養標籤規例，喺冇修改過嘅情況之下，通過咗。原先，自由黨嘅田北俊做到嘢，令政府提出修改規例，豁免賣三萬件以下嘅食物產品。點知到投票時，唔夠票。
大家可能會問：「食品要加標籤，關種族歧視乜事？」一種食品，要製造標籤，本身有固定成本，即係做一張或十萬張，都需要支付例如繙譯、化驗等嘅成本。如果產品賣嘅數量大，固定成本就可以攤開。不過一旦賣嘅數量小，就連天真嘅李華明都知，啲民主派最仇視嘅商人，唔賣就算。
少數民族被忽略
咁賣得數量小嘅嘢，邊類人買？孫柏文諗到兩類人。第一類，就係有錢人。佢哋買嘅食物產品，好多時因為售價已經高，所以商人能夠抵銷標籤成本，繼續賣。
不過第二類就冇咁好彩，佢哋買嘅食物產品，就會消聲匿迹。佢哋就係居住喺香港嘅少數民族。要知道呢條法例有幾戇居，只要經吓大腦就得。一個印尼人喺銅鑼灣開嘅士多，賣喺印尼進口嘅印尼食品罐頭，賣畀住喺香港嘅印尼人。佢哋講馬拉話，睇馬拉文，你𠵱家叫人貼張寫上中、英文嘅標籤，究竟係畀邊個睇？周一鑊你講，究竟畀邊個睇呀？
生活水準將降低
好啦，少數民族選擇少咗，whocares？民主黨、公民黨、工聯會一向以嚟對消費者嘅選擇權，極度藐視。不過，全球多個社區裏，少數民族、新移民要謀生，好多時要繞過言語障礙。其中一個方法，就係開小餐廳，中國人去到外國，好多都會開餐館。問題就係，正當少數民族開嘅餐館，規模唔夠大，不能從外地直接進口食品、材料，就只有向同鄉開嘅辦館買。𠵱家買唔到，少數民族、新移民不能謀生，不能融入社會。佢哋嘅小朋友長時間面對好高嘅失業率，最後要犯法維生。
我住喺深水埗，好多印巴族人。如果佢哋嘅後生仔，因為呢條法例，爆我屋企嘅格，令我仇恨佢哋，後果係咪余若薇負責？曾蔭權喺公務員體制裏打滾多年，一定認識好多少數民族公務員，點解今次要降低佢哋嘅生活水準呢？
金手指網誌： http://phatdat.blogspot.com