韓國偶像吳智昊因為劇集《茶煲阿四》演出張哲修一角，大受香港劇迷歡迎，尤其好多媽媽級fans。佢噚日嚟香港，準備出席今日Diesel旗艦店嘅開幕酒會，張曼玉同樂基兒都會捧場出席。
師奶fans唔見人
吳智昊噚日早上抵達香港機場，佢一身長袖恤衫加背心仔，再着條牛仔褲，戴住副眼鏡好casual咁出現，但排場就絕對唔casual，除咗一男一女助手一齊嚟香港外，現場早就有兩個外籍保鑣等候，仲有品牌活動嘅公關公司工作人員接機，一行人浩浩蕩蕩咁行去攞車，可惜零fans接機，唔知吳智昊班師奶fans係咪忙緊煮飯呢？好彩一位女公關好識做咁送咗束鮮花畀佢，收花嘅時候係吳智昊笑得最燦爛嘅一刻。
英文回應得一句
事前公關公司人員通水話吳智昊能夠操流利英語，回答問題係冇問題嘅，但係當記者問佢係咪第一次嚟香港，吳智昊好簡單咁話唔係，今次係第四次嚟香港，會逗留三日，之後再問佢任何問題，佢都只係笑同埋一粒聲都唔出。吳智昊嘅女朋友上年去世，有傳言話佢未紅嘅時候，曾經帶女友嚟過香港旅行，只可惜佢講完自己第幾次嚟香港之後就保持沉默，唔知係因為佢英語程度有問題，抑或怕俾人觸及傷心處呢？
