美洲最大嘅名酒拍賣行AckerMerrall&Condit，呢個星期六會喺港島香格里拉大酒店舉行首次拍賣會，今次出場嘅過千支紅酒、白酒同香檳，估計總值超過5,000萬港元，係亞洲歷來最大型嘅名酒拍賣會。其中全場最貴、12支1990年出產嘅750毫升DRCRomaneeConti紅酒最受注目，因為呢種酒被嗜酒中人視為極品，一聽見酒名已經豎起手指大讚頂呱呱，據聞唐唐同大劉都係愛好者，唔知200幾位報咗名參加競投嘅中港澳富豪之中，係咪包括佢兩位？
最貴一箱192萬元
專誠嚟香港主持拍賣嘅拍賣行總裁JohnKapon同八方講，呢批名酒係佢好辛苦斟掂歐美收藏家攞出嚟。上述所提嗰箱DRCRomaneeConti紅酒，估價更加高達192萬元，平均每支要成16萬，好多人聽到都會嘩嘩聲，但識貨之人就唔係咁諗。
金勞詹係曾經品嚐過DRCRomaneeConti嘅幸運兒，佢話呢種酒飲起嚟有啲玫瑰味，好香，其實好啱女士們享用。據佢所知，呢隻酒一向超貴，10幾萬一支係正常喎，話晒都係世界頂級名酒，相信啱飲嘅人都好樂意爭崩頭買嚟飲，但就唔包括佢，事關病癒冇耐嘅佢唔啱飲酒。
議員齊齊讚話正
議員石禮謙都話DRCRomaneeConti好正好甜，飲落真係好舒服。佢話自己飲酒都係注重同朋友分享同吹水多啲，相信都唔會去競投，有人請就梗係奉陪啦。自由黨肥仔張話自己曾經都係好酒之人，後生時都會飲啲好貴嘅酒，但年紀越大飲得越平，200、300蚊都有交易嗰隻，加上佢減緊肥，呢個拍賣會都好難見到佢蹤影。
除咗珍藏紅酒，拍賣會另一焦點係法國著名酒莊DomPerignon首度推出嘅一批巨型香檳，包括3支分別係1973、1976同1996年嘅1.5公升版DomPerignonOenothequeMagnum，估價總值24萬。另一支1996粉紅年份香檳Jeroboam估價16萬元，全部都萬中無一。
Kapon話財政預算案完全免收葡萄酒稅，酒商個個拍爛手掌，所以已經決定加場，今年11月再嚟香港搞拍賣會。今次拍賣所得嘅部份款項，會撥捐四川賑災。
mailto:[email protected]