領匯（823）自去年底至今，先後引入咗3位嚟自麥格理亞洲房地產高層專業人士，為領匯引入「先進營運模式」，原來呢個先進模式，連帶領匯商場旗下嘅租戶，都要跟住走。
噚日領匯旗下嘅深水埗富昌商場，就設立咗一家全港首創嘅商戶服務中心，為商戶提供裝修示範單位，鼓勵商戶裝修。領匯行政總裁羅爾仁話，過往唔少商戶已經陸續自我提升，為商舖注入新形象同活力，藉此提高對顧客嘅服務水平。
仲有，佢哋會喺6月正式成立「領匯商戶學堂」，教商戶最新嘅營商之道，頭炮嘉賓係著名飲食專家蔡瀾，蔡瀾噚日先醒商戶幾句，話成功嘅商舖最緊要令客戶記得佢哋一、兩個重點貨色，咁就夠晒，好似鏞記嘅皮蛋留畀佢深刻印象。