「疑似特首候選人」梁振英上個月喺一個電視節目上，拍晒心口話幫清潔女工阿英對付無良老闆，事隔一個月，阿英噚日趁行會開會，直踩政府總部請願，唔係找梁振英晦氣，只係要求政府盡快就最低工資立法。
梁振英都知好多人關注阿英情況，噚日表示助理一直有跟進阿英個案，早前曾介紹一份清潔工畀阿英，但阿英面試後認為返工地點太遠，車錢、飯錢負擔增加，一動不如一靜，最終冇轉工。
為顯示自己並非不了了之冇口齒之人，梁振英又話，佢睇過資料，其實阿英𠵱家人工高於市場平均數，其僱主冇違反政府合約，既然阿英認為做清潔人工奀，不如轉行啦，佢更介紹阿英參加再培訓課程，第時人工會高啲喎。
阿英同八方講，由於自己有份工做緊，擔心手停口停，所以冇時間再培訓，何況讀完呢啲課程都唔一定搵到好工，貿然轉工幾大風險，所以要諗清諗楚先決定。阿英話雖然梁振英喺鏡頭前拍心口後冇親自見過佢，但有搵助理跟進，算幫得吓手，不過佢話幫到佢一個人冇用，希望梁振英真係做多啲嘢，促使政府快啲就最低工資立法最實際。