細個每次同屋企人出街，只要見到巴士總會企定定，望住佢離開視線範圍先肯走，到咗中學時期，更會趁假期同班志同道合遊吓巴士河、影吓相，諗番起都開心！不過到咗今日，遊巴士河同影巴士呢啲活動已經少之又少，一來大家都忙，而最重要係現今嘅巴士款式比以前少咗好多。
記得以前中巴仲係本港專利嗰陣，旗下巴士款式超多，舊至七十年代嘅首代後置引擎巴士「珍寶」（DaimlerFleetline），定還是九十年代有冷氣嘅「銀豪」（VolvoOlympian），都好精神咁喺街上服務市民。但隨住專營權終結，一啲已服役多年嘅巴士漸次退役，取而代之幾乎係間間公司一樣嘅「躉」（DennisTrident）或者「超豪」（VolvoSuperOlympian），到今日最新嘅「眼瞓佬」（Enviro500）車身，更適用喺AlexanderDennisTrident同VolvoB9TL底盤上，只係車身顏色因應不同公司而有唔同，搞到無晒新意。
不過，正當一部部具特色嘅舊巴士漸次退役，一班有心嘅巴士迷就走去廢車場將佢哋買下，並修復成當年服役嗰陣嘅模樣，近日佢哋仲組織咗一個FansClub，等班志同道合嘅巴士迷可以聚集一齊，緬懷一吓呢啲巴士當年服役時嘅雄姿。唔知成日都話要着重保育嘅政府，點解唔開番個公共交通博物館，等呢啲舊巴士有棲身之所外，仲可以等市民大眾參觀吓呢？
記者：丹尼斯