長腿小姐呂慧儀（Koni），由行Catwalk的模特兒到港姐季軍到謎女郎再到《原來愛上賊》成了行Crabwalk至掂的「長腳蟹」，各大品牌爭相想Koni騷長腿。管她擁有43吋長腿，走紅，還是ing進行式！無巧不成話，剛從《鐵甲無敵獎門人》大馬之旅回來的她，膚色明顯地變得古銅健康，為Clinique示範最新的夏日古銅彩妝，閃亮啡Tone跟渴望煮得熟透真正變紅的長腳蟹竟出奇的搭調！
記者：陳諾堯
攝影：楊錦文
化妝篇
呂慧儀 夏天必要Bronzing
夏天出街塊面白濛濛認真唔好睇，想個樣望落去有健康的陽光氣息，當然要有點兒古銅Feel才似樣。唔知大家有冇留意，個身總是會比塊面易曬黑，唔想有兩截色，咪索性將個妝化得古銅色彩啲。但古銅顏色深度就當然要自己調校，眼妝和唇妝會是焦點所在，所以可以化得比平日Colourful，令雙眼看落精神，嘴唇突出。
Eyes層次咪躲懶
1.先在整個眼窩位置塗上粉紅色眼影。
2.再在眼尾開始塗上墨綠色眼影，慢慢掃開至眼頭。
3.於粉紅和墨綠色眼影中間塗上金色眼影，然後將它Blend鬆。
4.用啡色眼線膏畫上眼線。
5.然後再畫下眼線，在眼尾輕輕拉下，當作下眼的眼影。
6.在眼睫毛上塗上黑色睫毛液。
Lips學嘢兩溝
將帶閃的紅橙及令金兩色唇彩先在手背上溝勻，再塗上嘴唇。
LongLastGlosswearSPF15#Bonfire（左）、#Goldspun（右）各$120
Cheeks閃光古銅
顴骨位相對易Handle，只需打圈掃上Bronzer，然後向髮線位向上掃便成。
ShimmeringTonesPowderQuad$230
*以上產品將於5月31日開始發售
護腿篇
從Catwalk到Crabwalk 蛋白磨砂
自從三色台播出劇集《原來愛上賊》之後，Koni便一下子由「失聲的謎女郎」變成了街知巷聞的「長腳蟹」，但非馬後炮，小記早在她參選港姐時，已留意到她有一雙健美長腿，羨煞旁人！但還是至「長腳蟹」響朵起始，她才更着意為「悅己者容」，比平時更加緊張護腿，每逢得閒就會幫雙腿做按摩，Keep住做磨砂和日日搽幾次Cream，但係有對又長又靚嘅腳，點都抵啦！今次Koni仲會為我哋示範DIY蛋白磨砂，教大家夏天點樣護理雙腿，記住一齊學嘢！
DIY蛋白磨砂
材料：一隻生雞蛋、一湯匙粗鹽
做法：只取蛋白，然後加入粗鹽，攪勻並打至起泡。
用法：用指尖沾取，打圈式進行磨砂。最後用溫水洗淨，塗上潤膚膏。
護膚篇
日飲一碗皇帝湯
想知Koni點樣養顏護膚？唔使急，原來Koni真的有她的一套秘方。「我覺得身體調理得好先係最緊要，身體好，皮膚自然靚，心情亦會好。我盡量會每日飲一大碗家姐煲的古代宮廷保健湯，係我睇御膳食譜學番嚟，用鯽魚一條、半隻雞、豬手、山楂和紅棗等一齊煲，對身體好好。我為咗皮膚好，仲會唔食煎炸油膩食物，濕熱食物好似芒果咁，都可免則免。」睇嚟Koni真係好忍得口，抵佢皮膚咁好。「除咗飲食要控制得好之外，每日徹底洗面都好緊要，一得閒仲要做Mask，如果我有時間，都會用青瓜當Mask，天然嘢係最有效，對肌膚又無害。」
化妝師Tips：粉底混古銅光影液
化妝師Katherine話一定要利用夏天發揮Bronzing效果，否則其他季節用唔着，亦唔襯。「我上粉底時先會用夠薄同有SPF的粉底，然後再將粉底和古銅色的Up-lightingLiquid兩溝，令底妝更有光澤。眼妝絕唔可以馬虎，要逐層搽，最緊要將中間金色眼影Blend開，令整對眼望落自然和有層次。」
Up-lightingLiquidIlluminator#Bronze
和暖金光古銅色的光影液，最啱夏日妝容，不含油份和香料，所有皮膚適用。
查詢：Clinique（21968480）