遠東金源（1188）上個禮拜五宣佈，以400萬人仔，收購大陸採礦公司吉林晟世全部股權，交易冇乜特別，其他行家都有報道，但篇幅唔大，但華華睇完大陸《每日經濟新聞》嘅報道，就覺得呢單細新聞唔講得笑。首先，唔講大家可能唔為意，遠東金源主席，就係大名鼎鼎嘅仰融。
仰融係華晨汽車（1114）創辦人兼前主席，01年《福布斯》中國富豪榜排名第三，當時身家近70億銀，仰融最令人印象深刻嘅係，92年將華晨汽車喺美國上市，成為第一隻喺美國掛牌嘅中國公司。不過04年，仰融同內地政府因公司股權出現爭拗，搞到要出走美國，仲俾遼寧省發通緝令緝捕。
美國遙控遠東金源
家陣仰融係遠東金源嘅大股東，公司市值約11億銀，遠東金源前身係歡樂天地，仰融98年收購返嚟。間公司都經歷過唔少變動，先後改名圓通科技同圓通控股。
據報道，仰融仲喺美國，家吓遠距離遙控公司業務，今次可以稱得上係復出，將遠東金源作為最後籌碼。