滙控（005）CEO紀勤做嘢親力親為，早前俾人問到次按危機，佢總係好有承擔咁話，「會親自處理」同埋「親自承擔」，連噚日有小股東向佢投訴股東會嘅茶點混亂，佢一板一眼咁答：「我會同（滙豐亞太行政總裁）霍嘉治一齊處理。」仲落場睇小股東茶點嘅情況。
三年前已投訴
話說噚日滙豐為香港嘅小股東舉行非正式股東會，會上有小股東向紀勤批評茶點混亂，希望改善，呢個話題一出，其他小股東一齊和應，有個話早喺3年前寫過信畀滙豐高層投訴，亦收到集團回信話會改善，但到今次都冇改善，嗰位小股東義正嚴詞咁話：「以滙豐咁嘅江湖地位，唔可以失信於小股東！」其他小股東即刻拍晒手。
見到小股東講到「咁大」，紀勤等唔到霍嘉治，即刻喺茶點時間親自巡場，仲俾班小股東圍實，有個拎住一張贈券畀紀勤睇，叫佢下次學人哋送贈券。呢個CEO唔易做。