前日忽然有報道，指天主教香港教區主教陳日君樞機對近日傳送聖火引起衝突不以為然，認為中國人愛國情緒太激烈，愛國主義可能走向法西斯主義，甚至演變成獨裁政權好恐怖云云。陳樞機敢言好多人都知，但敢言唔代表口不擇言，事實上陳日君素來關心宗教自由同人權狀況，清心直說知道分寸，地震大災難當前，冇理由講出上述言論。
有人話畀八方知，原來上面一番說話，係陳日君早喺羅馬接受當地報章訪問時講嘅，當時未發生四川地震，點知份報紙前日先刊登訪問內容，又冇講明訪問日期，唔少香港傳媒，包括八方都有轉載，搞到好多人以為樞機好冇同情心，落井下石。教區噚日發聲明澄清，講述事件來龍去脈，更特別讚揚中國政府容許各國救援人員同傳媒入災區手法開放，陳樞機俾人誤解「實屬不幸」。