噚日先話36歲嘅軒歷拿臣（拿臣）要喺亡友奧當尼嘅慈善賽上陣，之後要趕返瑞典幫國家隊友賽斯洛文尼亞，驚佢因舟車勞頓影響表現。不過，拿臣真係寶刀未老，佢下半場入替柯碧克之後令到成隊瑞典都生晒，真係證明佢唔想喺歐國盃度做後備！
噚晚得一場直播賽事，所以我求大俠連瑞典對斯洛文尼亞呢啲咁「雞」嘅戲碼都照鯁。賽前已知瑞典會殘陣應戰，不過我求大俠真係估唔到，巴基斯奧古拍柯碧克可以差成咁；對住唔入流嘅斯洛文尼亞都咬唔入，淨係臨完半場靠連達羅夫符符碌碌咁滾入領1:0，真係睇到人差啲瞓着。
踢歐國盃唔想做後備
正當我求大俠想熄電視嗰陣，下半場見到拿臣入替柯碧克，即刻精神晒！果然，拿臣老而彌堅，入嚟先接應韋希姆臣嘅傳中，表演搶點頂頭槌「招牌貨」。55分鐘，拿臣仲同艾文達、韋希姆臣兩個左穿右插，又Nolookpass又後踭，十足表演賽咁；最可惜係拿臣最後一射中柱，如果唔係呢球組織咁靚，一定係近期金球。
最後瑞典1:0小勝斯洛文尼亞完場，拿臣雖然冇為球隊入波，但佢嘅傳波、射門腳腳有料到。𠵱家羅辛貝治受傷，唔知踢唔踢到歐國盃，柯碧克同巴基斯奧古狀態有幾差大家有眼見；之前拿臣講明踢歐國盃唔係想做後備，拉格碧見到佢今場咁嘅表現，識做啦？
你的意見?
●你認為軒歷拿臣能否在歐國盃再放異采？
請上 http://hk.myblog.yahoo.com/appleballmen/〈球蘋家〉留言