一度轟動地產代理界嘅非法回佣案上個月已認罪嘅中原地產前四大天王之一、工商舖董事總經理陳雁樓，家陣喺荔枝角拘留所等緊判幾耐。華華收到風，原來同陳雁樓同倉嘅亦係因為收受回佣被定罪嘅謝瑞麟父子。
行內人叫「Mark哥」嘅陳雁樓，早喺舊年中接受調查，今年4月中先至審完。呢單案一開審地產代理界已經擾擾攘攘，審緊嗰陣，中原老闆施永青都要被傳召出庭作供。47歲嘅Mark哥係最早被審兼認罪嘅一個，佢家陣還押監房，要等埋同案幾個被告，審完先知個官點判。
由於佢仲喺荔枝角，未去赤柱，所以比較自由，聽講話佢女友日日都去探佢，一班中原舊同袍自然唔少得。據探過Mark哥嘅朋友講，原來佢同謝瑞麟父子同倉。
入冊信主監內傳教
謝瑞麟同阿仔謝達峰，因為向旅行社同導遊提供非法回佣案，呢個月上旬被判刑要坐39個月監，阿仔就坐5年。Mark哥喺代理界吃得開，家陣喺倉裏面仲可能識到一樣落難嘅謝氏父子，唔知他日重出江湖，會唔會互相關照，幫謝瑞麟珠寶店搵間靚舖位呢呵！
明日嘅事明日先知，但有啲嘢，就真係唔講大家唔知。聽聞Mark哥受女友影響，信咗教，仲喺倉裏面傳道，成績幾好，已經有幾位倉友信咗主。唔知Mark哥有冇向謝氏父子傳道呢？
電郵：mailto:LiWaWa@AppleDaily.com