曹敏莉、陸詩韻同黃長興噚日盛裝現身尖沙嘴，擔任名錶模特兒，兩位靚女都大騷驕人身材，不過就以曹敏莉嘅低V裝較為搶鏡，着到咁性感，緋聞男友黃長興會唔會詐型㗎？曹敏莉即刻扯開話題，話靚衫都係為咗襯靚錶，黃長興都有讚佢哋兩個着得好靚。
緋聞多冇人吼
問曹敏莉點解件衫比陸詩韻嗰件搶鏡，曹敏莉就解釋話晚裝係大會安排，佢話：「睇吓乜嘢角度睇，最緊要適合場合需要。」陸詩韻表示主要係騷名錶，性唔性感其實都唔係咁緊要，而佢都收藏咗近20隻名錶。問到早前被指同律師林炳昌約會，陸詩韻話：「係朋友嚟，未入行前就識佢，我澄清𠵱家冇男朋友，成日咁傳，令到冇人敢追我。」
至於今次擔任司儀嘅朱潔儀，佢話近年專注畫畫，同一班畫友打算捐出作品義賣，幫四川災民籌款，但暫時仍未決定捐幾多幅，不過佢原定年底開畫展，因為遇到啲問題而要押後，或者要等明年先開嘞。