Ubisoft向來以推出製作認真嘅主觀射擊見稱，《RainbowSix》同《GhostRecon》兩大系列一直都有勁多支持者，即使推陳出新都唔見有乜跌Watt。為討好班PS3機主，廠方專程整隻原創獨佔野心作《Haze》，畫面表現都叫見得吓人，奈何始終唔係通殺作品，明顯睇到投放資源唔係特別多，導致製成品仲未拍得住廠方兩大系列，進步空間仍然唔小。
文：陳福榮
注射藥物增能力
呢隻宣稱只喺PS3推出嘅獨佔作品，大概係Ubisoft響Xbox360面世初期先後整過《GRAW》同《RainbowSixVegas》呢兩隻暢銷大作，搞到較遲面世嘅PS3無福消受，要續集先至兩部機都玩到。可能係為咗平息Fans不滿，廠方情商曾炮製三年前《TimeSplitters》各個版本嘅FreeRadical小組嚟整《Haze》，技術方面絕對唔使擔心，但略嫌粗枝大葉咗少少。
《Haze》嘅玩法同傳統FPS分別唔大，只係響世界觀度落多咗工夫，講述一間表面做正當生意嘅企業，背後其實秘密研製名為nectar嘅黃色藥物，當注射落血液就會令人興奮得能力提升，如果OD（過量服藥）只要唔死仲會變到超人咁勁。結果衍生出一批膽正命平嘅僱傭兵，佢哋喺同南美叛軍作戰嘅期間，發現自己投身戰場嘅宿命與殘酷事實，從而決定棄暗投明……
揸飛機戰車未必好
驟眼睇啲畫面，《Haze》都幾似顏色變成又黃又紅嘅《Halo》，無他嘅，槍械設計同士兵裝甲都幾類似，兼且都有啲做得幾奪目嘅戰車飛機之類，唔使成日都靠兩條腿喺戰場上拼搏。但若然認真咁一直玩落去，就會發現佢啲操控差過人哋幾班，連當年Xbox嘅《Halo》第一集都不如，大家都係咪太依重呢啲花臣嘢，正正經經做個行路小卒好過。但老實講，佢啲戰車款式同武器種類都算唔少，即使冇興趣用嚟做攻略都可以隨便玩兩手。
畫質穩定速度快
單從示範片段同硬照，《Haze》已畀人幾討好嘅感覺，結果實際完成品都冇令人失望，果然係做慣主觀射擊嘅UBI。佢個遊戲引擎幾適合高速戰鬥使用，就算同畫面分割嚟合作或者對戰，畫質都冇明顯變差，兼且跑到好快亦唔會拖慢窒機，但若然仔細咁去觀察，應發現佢啲偷雞嘢都幾明顯吓。如果玩家想享受好似《Vegas2》咁正斗嘅超班畫面，咁應該會幾失望，始終製作小組技術唔係頂班，係咁上下貨色㗎喇。
機種：PS3
廠商：Ubisoft
類型：ACT
人數：1-4人（網上連線16人）
日期：發售中
售價：約$420
