陳豪同廖碧兒呢對緋聞情侶，噚日又以情侶檔姿態搵銀，喺九龍灣出席奧運宣傳活動，仲齊齊着住Nike運動裝打乒乓波。向來廣東話麻麻哋嘅廖碧兒講解乒乓波由來，講到一嚿嚿，冇人聽得明佢講乜，結果要陳豪再演繹一次，場面相當搞笑。
陳豪請纓為廖碧兒做繙譯，查實佢哋嘅廣東話都係海軍鬥水兵，不過整體上男方稍勝一籌。現場見佢哋講得好好笑，仲順便喺台上打情罵俏，司儀崔建邦都忍唔住寸佢哋，陳豪四萬咁口，廖碧兒就企一邊繼續扮儍。
睇中摺叠單車
今次陳豪同廖碧兒情侶檔宣傳，唔知會唔會收貴啲？陳豪話：「我又唔清楚，應該差唔多，我不嬲都係收咁多，唔會坐地起價，最緊要係大家畀機會。」廖碧兒喺無綫出名騷多，唔知陳豪會唔會視緋聞女友做目標急起直追？佢話：「唔好咁講，託賴今年都幾好，成績滿意。」
廖碧兒同陳豪都鍾意做運動，不過廖碧兒強調自己鍾意嘅運動同陳豪唔同，佢話：「我鍾意跳舞，佢就鍾意跑步，最近我想學單車，喺網上已經睇中一架摺叠單車。」