城大校長郭位啱啱到位兩個星期，噚日首次同傳媒見面已經講出未來發展好多大計劃，包括將來打算提升校友捐款嘅比例，由𠵱家4%提升至25%。佢仲話雖然唔係香港人，但佢覺得籌款唔係一個校長做晒，應該由專業人士成立專業團隊同制度去做，所以佢專誠請咗一個籌款好叻嘅美國朋友，7月嚟香港成立一套系統以便聯絡校友募捐。
除咗籌款，郭位好老實咁話城大以前好多風風雨雨，又被外面話山頭主義，佢覺得過去嘅已經過去，未來都係努力為城大做嘢，主力搞好學術，仲有信心將城大嘅世界排名，10年內提升到100名以內。
雖然郭校長第一次見記者，但佢一啲都冇怯場，仲好親民咁同記者話佢曾經係行家，佢喺大學時都曾經做過學生報嘅老總，當年佢訪問過第一位參加奧運嘅中國選手㖭。郭校長又自爆煮嘢食好叻，佢早排仲喺科大搞咗個烹飪講座，教授入廚技巧，最叻就係煮酸辣湯，遲啲得閒再煮畀大家試吓喎。