【澳門直擊】膚色黝黑的古天樂前晚在澳門領取十大傑出衣着獎，整晚由得獎人變做人肉佈景板，不停與來賓合照，尤其深受女賓客歡迎。一身密實裝束上陣的黎姿明顯心情麻麻，當談到其弟黎嬰的康復狀況在進步中時，她謂希望弟弟能早日痊癒。
何超儀和古天樂多次奪得十大傑出衣着獎，前晚他們跟黎姿、陳豪和郭品超等一同在澳門領獎。膚色黝黑的古天樂身穿黑色禮服，甚受歡迎，晚宴期間不斷有女嘉賓和贊助商上前要求跟他合照，令他多次從座位站起，變成人肉佈景板。
古仔說：「攞呢個獎已經有三、四次喇，我着衫都係憑直覺，可能我黑，着白色衫易襯啲，不過自己就鍾意黑衫。」他直認身形多年沒大改變，現時體重170磅，他說：「成日開工，瞓都冇得瞓啦，邊會有肚腩呀？」他揚言最怕穿古裝拍戲，他說：「好熱，成身濕晒，冇儀容可言。」問到好友吳卓羲被指狂媾佘詩曼兼食軟飯，古仔即說：「我可以代佢講『唔係事實嘅唔回應』，我同佢冇乜聯絡，不過朋友在心中，大家都忙，明白嘅。」
子聰多少婦Fans
何超儀（Josie）則是她們四姊妹中得獎次數最多的，她說：「佢哋係事業型女性，唔會着咁多燦爛，咁多顏色嘅衫。」她自爆是婚後首次攞獎，更笑言跟老公陳子聰一高一矮是黃金比例，她說：「我企喺佢身邊，永遠好好睇，唔使減肥。」近年陳子聰暴肥，有指是她刻意安排，Josie笑說：「唔好屈我呀，我不知幾擔心，佢肥咗仲有吸引力，𠵱家多咗少婦fans，成日都有人投懷送抱。」
盼黎嬰盡快康復
以一身Dior長袖密實裝束上陣的黎姿雖然得獎，卻明顯心情麻麻，問一向被封為「愛美神」的她覺得上圍豐滿是優點還是負累？她說：「係勻稱囉，比例適中。」提到雜誌偷拍到黎嬰的康復狀況在進步中，她說：「我不斷探佢，都係父母照顧多啲，係有進步，希望快啲康復啦。」
此外，陳鴻業去年涉嫌襲擊鈴木仁，早前上訴得直脫罪後一直沒公開露面。與他風雨同路的未婚妻鄭詩韻的公關公司前晚在澳門為香檳品牌VeuveClicquot搞party，陳鴻業也靜悄悄赴濠江出席派對，還幫忙招待來賓。採訪：RitaLeung 攝影：EdwardChou
