由息影俠女徐楓發展、有中國最貴公寓之稱嘅「湯臣一品」，位於上海陸家嘴，由於樓價唔平，所以06年推售至今，都係賣得幾間。
噚日大陸《東方早報》報道，「湯臣一品」轉售為租，sorry，應該係只租不售，咁貴為「最貴公寓」，開出嚟嘅租金當然唔平，同樓價一樣，喺國內都屬於天價。
話說今勻出租嘅，係屋苑4棟濱江景觀嘅B棟樓單位，首推10個，3至4房格局，面積434平方米（約4672方呎），頂層複式就1240平方米（約13347平方呎），月租由7.5萬至12萬人仔，租期1年。
華華粗略計一計，3至4房嘅話，呎租大約16至26蚊，喺國內絕對係頂級，但相對香港，呢個呎租可以租到麗港城、滙景花園、海怡半島、杏花邨及康怡花園咁囉！