我諗喺呢一刻，無論車主定係職業司機，最痛恨嘅一定係油公司，因為佢哋淨係識得加價，想佢減價？咁你真係好天真又好儍啦！
係，國際原油價格由去年底約100美元一桶，喺5個月間暴升至日前嘅132美元一桶，油公司所承受嘅壓力日趨嚴重，但個人認為呢啲唔係不停加價嘅藉口囉！好簡單，究竟油公司運油嚟香港賣嗰陣，係咪每次都啱啱會係喺國際油價上升嗰陣落Order又或者運到呢？點解油價回落嗰陣，又唔見佢會即刻減番價？仲有最好笑嘅係，點解兩間新加入嘅油公司，喺一齊加價嘅同時，都仍然可以為車主提供各式即時折扣優惠，不過搞完一大輪儲完一輪積分，回贈同換到嘅油加埋都唔夠一百蚊？但我同你隨時已經入咗成千蚊油！
當大家話油公司搶錢之際，偉大嘅政府又會同你講，呢個係自由市場經濟，愛莫能助喇！既然係咁，我哋不如一齊自求多福，橫掂$20/L嘅油價都指日可待，不如索性唔揸車，日日搭巴士迫港鐵，睇吓用油需求劇減嗰陣，嗰啲淨係識得加價但唔識減價嘅油公司，到時有咩辦法自救囉！
記者：丹尼斯