我求大俠自問草根，成日聽人講個「柒」字，就會下意識諗係形容緊好渣、好冇用、好丟架，當然亦可以講緊足球員嘅冧巴。
好似曼聯「7」號仔基斯坦奴朗拿度（C朗）踢到識飛，就係今季Bestofsevens（最叻7號）；相反着車路士7號球衣嘅舒夫真高，就係「7」中最「柒」，因為球隊唔想要佢外，連美職聯球隊都耍手擰頭，呢個稱號軍刀真係配到絕！
軍刀美職都唔要
以波論波，今季英超除咗C朗冇負7號呢個冧巴外，其餘球員唔係場內場外表現差，就係黑仔到痺。先講車仔價值3,000萬鎊嘅舒夫真高，今季只得5個聯賽入球，表現完全同身價成反比。最近傳出車仔下季唔想留軍刀，舊會AC講明興趣唔大，其他英超球會又唔吼佢，最慘係連美職嗰邊嘅球隊都全部sayno！
祖爾巴頓Worstofsevens
其餘嘅「7」號仔好似阿仙奴嘅路斯基、利物浦嘅基維爾同紐卡素嘅祖爾巴頓，一樣全部冇運行。路斯基季初都叫表現幾好，點知季尾受傷患困擾，搞到最後連歐國盃都踢唔到。紅軍「7」號仔基維爾又係冇運行，受傷多過踢波，近年又得唔到領隊賓帥歡心，𠵱家約滿咗冇得續約，仲俾球會放棄埋，真係負晒紅軍歷屆咁多好波「7」號仔之名。
算喇，以上幾位「柒友俱樂部」成員都不外乎表現差、成日受傷丟架啫，但祖爾巴頓都可謂Worstofsevens（最衰7號）！呢位紐卡素中場因場外嚴重傷人，最近俾法庭判咗坐半年監，足球員變咗監躉，你哋話點喇！
你的意見?
●你認為誰是今季最霉的7號仔？
請上 http://hk.myblog.yahoo.com/appleballmen/〈球蘋家〉留言