副局長與政治助理名單出籠，大家議論紛紛，呢日在日航酒店食飯，隔籬枱竟然係政壇元老與一名積極考慮參選嘅才俊，睇怕係後輩向前輩請教都唔定。食到單尾之際，才俊先鬆人，元老於是坐埋嚟我哋呢邊，話有十五分鐘時間傾吓偈。左丁山等自然歡迎，聽吓元老講政治。
元老話對副局長與政治助理名單暫時不予評論，要公道啲，等新人表演吓先，唔好一早話人唔掂。不過佢就大彈發放名單時，手法不佳，啲副局長與政治助理唔敢公開見記者，令人覺得有啲問題，此外副局長是否可以持有外國護照，法律上係灰色地帶，冇人話可以，亦冇人話唔得，但民建聯嘅蘇錦樑既然持有加拿大護照，何不亁脆承認，點解要遮遮掩掩，卒之認咗吖。元老話聽到一啲記者報訊，仲有四位副局長懷疑持有外國護照㖭！
做得從政公眾人物，揸甚麼護照唔能夠當係私隱，大大聲講出嚟，怕乜嘢呀，收得太密，反被人懷疑。元老話《基本法》第六十一條話明，香港特別行政區的「主要官員」內，由在外國無居留權的中國公民擔任。究竟副局長與政治助理，皆屬政治任命，算唔算係「主要官員」？《基本法》第四十八條第五項講明主要官員係各司司長、副司長（按：香港沒有副司長）、各局局長、廉政專員、審計署署長、警務處處長，入境事務處處長、海關關長等等。基本法發表時，未有人諗過香港特區會有政治任命嘅副局長與政治助理等官職，元老半開玩笑咁話：「不如提請人大釋法，澄清第四十八條第五段及六十一條。呢類原則性問題唔可以特區政府或民建聯說了算！」左丁山諗，冇咁複雜啩，不如曾特首會同行政會議正式宣佈：副局長與政治助理不是香港特區主要官員就得啦，困難之處係，如局長突然有病入住醫院兩個月，副局長就會署理局長，咁又係唔係「主要官員」呢？譬如蘇錦樑（加拿大人）可唔可以暫時署理馬時亨之局長職位？呢啲問題，暫時冇人識答！