四川世紀大地震，震撼人心，一幕幕生靈塗炭、一幕幕人性光輝，令唔少人感受至深，就連一向有淚不輕彈嘅警隊「二哥」任達榮，亦話忍唔住掉下男兒淚。好多人都知任Sir係演員任達華嘅哥哥，但唔係好多人記得，任Sir爸爸當年被同僚槍殺嘅細節。任Sir噚日喺電台節目重提往事，仲話爸爸出事後佢冇流過淚，直至為爸爸設靈，先喊咗一場。
難忘爸爸遭擊斃
任Sir噚日接受港台《舊日的足跡》訪問，重提當年做水警嘅爸爸，喺當值期間被懷疑精神病發嘅同僚開槍擊斃嘅傷痛。當時任Sir只得16歲，仲讀緊中四，爸爸當日只係臨時替更，佢就帶埋細佬喺水警總部打乒乓波等爸爸收工。
任Sir仲記得，打打吓波有個沙展走入嚟，佢已經有啲不祥嘅預感，因為爸爸向來好黑仔，曾經試過有個水警同僚「變節」，連埋架船被挾持返大陸，後來先放返嚟香港。佢即時問個沙展，爸爸係咪又出事，但對方話冇事，結果返到屋企，夜晚警隊就派人前來通知爸爸嘅死訊。
任Sir話佢作為長子，當時冇流過一滴眼淚，只係掛住諗兩個細佬妹嘅學業，同埋媽媽未來生活嘅問題，直至爸爸設靈時候，佢先忍唔住喊咗一場。後來佢讀完預科，就投考警隊，完成爸爸遺願。事隔近40年，一切已成往事，任Sir𠵱家已經貴為警務處副處長，仲有兩年就到57歲退休。
寄語災民向前望
噚日佢講起當年舊事，語調好平靜，但佢話，近日睇到四川地震嘅片段同報道時，都感動流淚，只希望災民收拾心情向前望。
講到細佬任達華，任Sir笑言，間中都會俾人叫錯做細佬個名，甚至試過有啲畀佢嘅公函寫錯咗「任達華收」，但細佬就未試過俾人叫做「任達榮」。不過佢話一啲都唔介意，仲以細佬為榮，而且佢哋三兄弟妹感情一向好好。
任達華曾經憑《PTU》成為影帝，做過PTU校長嘅任達榮爆料話，細佬自小有演戲天份，讀書時已兼職拍廣告。被問到細佬經常喺電影中扮演黑社會人物，作為警隊二哥嘅佢有冇唔高興，佢就話明白細佬都係身不由己，但有時都會喺適當時候同細佬反映吓喎。
mailto:[email protected]